Traballadór EDTL halo instalasaun ba eletrisidade iha área Bebora, munisípiu Dili. Imajen TATOLI/António Gonçalves

DILI, 29 dezembru 2020 (TATOLI)—Iha janeiru to’o outubru 2020, Ministériu Obra Públika liuhosi Eletrisidade de Timor-Leste Empreza Públiku (EDTL, EP) kosege rekolla reseita hamutuk $28.174.941,93 liuhosi kliente eletrisidade ne’ebé hola pre-pagu.

Tuir nota ne’ebé Agência TATOLI asesu, reseita ne’e konsege rekupera atribuisaun pre-pagu eletrisidade $15 ba kada uma-kain no atribui servisu pagamentu 50% husi tarifa ba konsumidór eletrisidade nian iha rejime pós-pagu nian iha ambitu resposta ba kombate surtu COVID-19.

Iha abríl, Governu atribui subsídiu eletrisidade $15 kada kliente pre-pagu hamutuk 160.555, ne’ebé ba faze dahuluk hamutuk kliente 128.657 (80%) ativu, ekivalente ho montante osan $1.929.855

Enkuantu, iha maiu, subsídiu pre-pagu eletrisidade daruak ba faze daruak hamutuk kliente 122.495 (76,3%) ativu, ekivalente ho montante osan $1.837.425.

MOP liuhosi EDTL,EP atribui mós subsídiu pagamentu 50% husi tarifa referente ba konsumidór eletrisidade iha rejime pós-pagu iha períodu Estadu Emerjénsia iha 28 abríl to’o 27 maiu 2020, husi totál kliente pós-pagu iha sistema EDTL nia hamutuk 1.614 no husi númeru ne’e 611 (37,8 %) mak halo ona afirmasaun  ba subsídiu refere to’o loron 17  jullu 2020.

Nune’e, EDTL asegura sistema distribuisaun enerjia eletrisidade inklui atendimentu diária, manutensaun programada no la programada,  atendimentu   servisu emerjénsia iha Dili no iha munisípiu hotu ho naruk hamutuk sirkuitu kilometru 29,109.

 Aleinde ne’e, kontinua superviziona ba konstrusaun liña distribuisaun Média Tensaun (MT) iha sirkuitu kilometru 5,35 no baixa tensaun (BT) hamutuk sirkuitu kilometru 3.

Iha 2020, kontinua superviziona ba projetu Eletrifikasaun Nasionál (PEN) hamutuk 114 no husi númeru ne’e iha biban halo hotu projetu 32 no agora hela de’it projetu 82, ne’ebé inklui Dili no teritóriu tomak.

“Halo preparasaun dezeña no BoQ ba pakote projetu hamutuk 34 ba suku 76 ne’ebé seidauk hetan asesu ba enérjia eletrisidade. Prepara dezeña no Bill of Quantities (BoQ) ba installasaun eletrisidade Médiu Tensaun no Baixa Tensaun hamutuk kilometru 8,5 iha Atabae to’o Rai-Robo ba Sentru Formasaun Polísia postu Atabae munisípiu Bobonaro, ne’ebé ninia prosesu aprovizionamentu kompletu ona no sei implementa iha 2021,” refere nota imprensa ne’e.

 Kontinua realiza no apoiu programa ‘Dili Sidade Seguru’ liuhosi instalasaun iluminasaun estrada iha dalan protokolu no bairru sira iha Dili laran.

MOP hala’o estudu no dezeñu ba konstrusaun sub-estasaun ida iha Tibar kompletu ona no implementasaun sei hahú iha 2021 no prepara Switching Substation ida iha munisípiu Aileu no Ermera.

Kontinua installa no normaliza kontadór pre-pagu hamutuk unidade 13.341 no kontadór ne’ebé kobre área Dili no munisípiu. 

Installa kontadór AMR (Automatic Meter Reading) hamutuk unidade 24 ba grande kliente iha área munisípiu Liquiçá no Dili.

Aleinde ne’e, MOP mós  iha hela prosesu preparativu no diskusaun ho parseiru dezenvolvimentu liuhosi modu impréstimu ba investimentu modernizasaun sistema dijitál liña distribuisaun, iha faze ikus antes Governu halo rekezitu formál no hetan aprovasaun husi parseiru dezenvolvimentu.

 Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here