Ministru Ensinu Superiór, Siénsia no Kultura, Longuinhos dos Santos. Imajen/Egas Cristovão

DILI, 29 dezembru 2020 (TATOLI)—Ministru Ensinu Superiór Siénsia no Kultura (MESSK), Longuinhos dos Santos, hateten Embaixada Timor-Leste iha Indonézia daudaun ne’e prosesa ona dokumentu kona-ba estudante Nelson do Nascimento ne’ebé mate tanba moras hodi lori filafali mai Timor-Leste.

Matebian Nelson do Nascimento, estudante naun bolseiru ne’ebé estuda iha fakuldade medisina Universidade Etikes Kendedes Jember Indonézia, hakotu iis iha Ospitál Jember iha loron 28 fulan-dezembru 2020.

“Ha’u simu ona informasaun katak agora daudaun ita-nia Embaxadór iha Indonézia trata hela dokumentu balun iha ospitál ne’ebé ita-nian alin estudante ne’e hodi bele fasilita dokumentu ba prosesu atu lori fila mai Timor,” nia dehan iha edifísiu Ministériu Edukasaun Juventude no Desportu (MEJD) Vila-Verde, tersa ne’e.

Governante ne’e husu ba família matebian atu halo pedidu ba Ministériu Solidaridade Sosiál no Inkluzaun (MSSI) atu apoiu osan sosa billete no kaixaun hodi lori fila mate isin mai Timor-Leste.

Entretantu, Matebian Nelson do Nascimento moris iha loron 22 fulan-janeiru 1997 iha Munisípiu Covalima.

Jornalista :Tomé Amado   

Editór :Agapito dos Santos

HAKEREK NO HATÁN

Please enter your comment!
Please enter your name here