Komandu PNTL Dili detein membru grupu arte marsiál (GAM) na’in-29 ne’ebé deskonfia envolve iha kazu konfrontasaun iha Aldeia 05 (eis Merkadu Comoro), Suku Fatuahada, Postu Administrativu Don Aleixo, Munisípiu Dili, segunda kalan 28 dezembru 2020. Imajen Tatoli/Eugénio Pereira

DILI, 29 dezembru 2020 (TATOLI)-Komandu Polísia Munisípiu Dili rejista durante loron  Natál, 24 to’o 27 dezembru 2020, mosu kazu no insidente hamutuk 47 maka akontese iha Munisípiu Dili.

Notísia Relevante : Konfrontu membru arte marsiál, PNTL detein ema na’in-29

Komandante PNTL Munisípiu Dili, Superintendente Xefe Henrique da Costa dehan, kazu sira ne’ebé akontese kompostu hosi kazu krime, asalta malu entre joven sira, hemu tua lanu, no asidente ho motór ne’ebé rejista aas liu iha Polísia Eskuadra Don Aleixo nian.

“Durante selebrasaun festa Natál ita nia Polísia Eskuadra Don Aleixo rejista kazu insidente hamutuk 47 no iha eskuadra polísia tolu hanesan Kristu Rei, Vera Krús no Nain Feto, Atauro no Metinaro  rejista duni kazu, maibé menus hosi 10, la rezulta ema mate,” Superintendente Xefe, Henrique  informa ba jornalista, ohin, iha Komandu PNTL Dili.

Henrique dehan, problema sira-ne’e mosu, maibé la perturba situasaun seguransa iha Dili, tanba parte PNTL hetan apoiu hosi Polísia Militár (PM), Unidade Espesiál Polísia (UEP) hala’o nafatin patrullamentu hodi garante seguransa.

Nia hatutan, iha selebrasaun misa Natál 24 kalan no misa Natál 25 loron, situasaun seguransa kontroladu no la mosu problema ruma durante misa hahú to’o remata.

PNTL Dili sei kontinua koopera nafatin ho Polísia Militár Centro Formasaun Polísia Akademia Comoro (CFP), Unidade Espesiál Polísia (UEP), Unidade Polísia Fronteira (UPF), Unidade Polísia Marítima (UPM) no sei kontinua servisu hamutuk hodi garante seguransa to’o selebrasaun 01 janeiru 2021.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here