Hakerek nain, Elidio Agusto Guterres.

Hosi: Elidio Agusto Guterres*)

Introdusaun

Ita ema nu’udar homo viator. Moris iha locus no tempus ne’ebé dinamiku, sempre iha mudansa. Iha mudansa ne’e, ita rekoñese ita nia-aan (self-recognition) no realiza ita nia-aan (self-realization) maibé sempre presiza ema seluk iha ita-nia moris atu rekoñese no realiza ita nia-aan nu’udar homo sosius. Maibé iha relasaun entre individu, grupu ka sosiedade, sempre iha ­konflitu ne’ebé bele hamosu caos (problema). Atu hamenus ka rezolve caos ne’ebé iha, filozofu balun hatuur rekoñesementu entre individu no grupu sai dalan ne’ebé di’ak atu ita liu. Dalan ida-ne’e mak filozofu sira hanaran, recognition ka rekonesementu (pengakuan) no ida-ne’e mak presiza ita refleta iha tempu Natal no tinan foun 2021, atu bele hatene problema sosiál no politika durante tinan 2020 no rekoñesimentu entre-sujeitu no grupu iha sosiedade no palku polítiku, (nst) presiza sai prezente iha Natal no tinan foun 2021.

Teoria recognition ka rekonesementu (pengakuan), teoria ida-ne’ebé mosu kleur ona iha mundu filozofia nian. Filozufu kontemporanu sira-ne’ebe ko’alia kona-ba rekoñesimentu mak hanesan Taylor, Frasscer, T. Adorno, Axel Honneth, nst. Teoria rekoñesimentu sai topiku ida-ne’ebé di’ak no furak tebes atu haree no analiza problema sosiál no polítika iha moris loro-loron niaan. Tanba, teoria rekoñesimentu hanesan teoria filozofia ne’ebé hatuur iha reflesaun no analiza filozofia ne’ebé sistematiku, metodiku, kritiku, ne’ebé kle’an atu hetan abut (radix) hosi problema sosiál-polítika. Tanba ida-ne’e, ita presiza hatene saida mak teoria rekuñesimentu iha tempu natal no tinan foun 2021, atu ita bele refleta no haree problema ne’ebé mosu ho hanoin ne’ebé kritiku. Atu nune’e, natal 2020 sai tempu reflesaun ba aktu sosiál-polítika ne’ebé ita enfrenta no tinan foun 2021 sai hanesan tinan rekoñesimentu entre sujeitu no grupu iha sosiedade no palku polítiku ho pensamentu filozofia rekoñesimentu Axel Honneth.

Sé mak Axel Honneth?

Axel Honneth, Filosofu kontemporeru, Mazhab Frankfurt Jenerasun III, moris iha Essen-Alemaña, iha 18 Juli 1949, oan hosi Horst Honneth Annemarie. Honneth moris iha família ne’ebé ho kondisaun ekonomia ne’ebé di’ak no moris iha sosiedade borjuista, maibé situasaun ida-ne’e la influensia nia atu sai ema-ne’ebé haluha saida mak importante iha nia moris. Honneth hala’o nia estudu iha area filozofia, sosiologia no literature/leituras (sastra) Alemaña iha Rheinische Friedrich-Wilhelms-Universidade Bonn dan Ruhr-Universitat iha tinan 1969-1974 no hetan nia titlu M.A iha área filozofia. Iha tinan 1982 kunklui nia estudu doutoramentu iha universidade Freia, Berlin. Iha tinan hanesan, Honneth, sai asistente sientifiku iha institutu sosiologia, Universidade Freie, Berlin. No, iha tinan hanesan, Honneth, sai asistente filozofu Jurgen Habermas.

Hafoin hala’o no konklui projetu peskiza iha área filozofia no sosiologia ho Habermas, iha tinan 1991-1992, Honneth sai Profesór iha Universidade Konstanz no iha tinan 1992-1996 sai profesór mós iha área filozofia polítika iha Universidade Freie, Berlin. Tan matenek ne’ebé nia iha, iha tinan 2001, Honneth sai Diretór Institutu Peskiza iha Goethe-Universidade Frankfurt, troka nia s mestre filozofu Jurgen Habermas ne’ebé famozu ho nia teoria dialetika.

Durante halao nia serbisu nu’udar akademiku, Honneth fó ona ninia kontribuisaun barak iha mundu akademiku. Hosi universidade ida ba universidade seluk, Honneth fó hanorin no simu ona kondekorasaun barak. Livru sira ne’ebé Honneth hakerek ona mak hanesan: The Critique of Power, Reflective Stage in a Critical Sosial Theory, Freedom’s Right, The Social Foundation of Democratic Life, The Patologies of Individual Freedom, Hegel’s Social Theory, Refication: A New Look at an Old Idea, Redistribution or Recognition?: A Political-Philosophical Exchange, Social Action and Human Nature, The Struggle for Recognition: The Moral Grammar of Social conflicts, Disrespect: The Normative Foundations of Critical Theory, The I in We, nst.

Tanba nia matenek no kontribusaun tomak, agora Honneth sai filozofu no krítiku sosiál ne’ebé sei moris. Ema rekoñese nia hanesan jerasaun III hosi teoria krítiku (Mazhab Franfrut) ne’ebé jerasaun primeiru reprezenta hosi filozofu Theodor Adorno, Walter Benyamin, Max Horkheimer, Erich Fromm no Herbert Marcuse. Jerasaun segundu reprezenta hosi Jurgen Habermas, Albert Welmer, Oskar Negt, Claus Offe no Karl Otto Apel.

Kondisaun Sosiál Politika Kontemporanu doko rasio Honneth

Pensamentu Honneth mosu la sees hosi kondisaun sosiál no polítika ne’ebé nia hasoru iha nia moris. Kondisaun rua ne’e, ita bele dehan doko rasionalidade Honneth halo kritika no hamosu nia pensamentu kona-ba rekoñesimentu. Hanesan ita hotu hatene katak, pensamentu pos-modernizmu mosu ho nia hanoin ne’ebé diferensa ho tempu modernu no halo krítika no halo revizaun ba tempu modernu. Filozofu pos-modernizmu ne’ebé halo auto-kritika ba pensamentu modernu ita bele haree iha filozofu Michael Foucault, ne’ebé kritika konsekuensia sira negativu hosi tempu modernu ho analiza ba relasaun siénsia no poder. Iha ne’e, Focoult, halo kritika ba injustisa ne’ebé akontese iha sosiedade hanesan diskriminasaun seksual no poder ba sira ne’ebé laiha forsa. Haree ba kritika ida-ne’e, pos-modernizmu hato’o prinsipiu foun ne’ebé tau atensaun ba igualdade (equality), solidaridade (solidarity), respect, autonomia, rekoñesimentu, no emansipasaun individu.

Hosi pensamentu kritiku iha leten, doko Honneth nia rasio atu ko’alia mós kona-ba  multi-kulturalizmu no femenizmu, ne’ebe luta atu hetan igualdade. Ita hotu hatene tempu modernu domina ho politika maskulinu ne’ebé hatuur mane hanesan sujeitu ne’ebe perfeitu, iha forsa no matenek. Haree realidade sosiál no politika hirak ne’e, tuir Honneth presiza rekoñesimentu atu hamenus no hapara praáika hanesan ne’e. Formatu sosiál polítika tenke iha remodelasaun. Tenke iha igualdade no rekoñesimentu entre sujeitu no grupu ka sosiedade. Feto mós iha poder no direitu ne’ebé hanesan atu hala’o knar iha kareira polítika no iha sosiedade. Atu atinji ida-ne’e, tuir Honneth presiza luta, luta atu hetan rekoñesimentu no rekoñesimentu hanesan mediu atu hetan armonia.

Teoria Rekoñesimentu Honneth no Hegel

Bainhira ko’alia kona-ba teoria recognition (Honneth), ita labele sees hosi filozofu Hegel. Honneth hetan influensia makaas hosi Hegel. Ita bele dehan, teoria recognition Axel Honneth hanesan teoria ida-ne’ebe hatuur iha fondasaun pensamentu filozofu Hegel, ne’ebé dala barak ko’alia kona-ba universalidade no justifikasaun rasio (justivikasi akal), iha mudansa, liberdade, igualdade, demokrasia, solidaridade, no justisa ne’ebé sai pontu importante iha tempu aufklarum (pencerahan) ka tempu nabilan/naroman. Axel Honneth mós hanesan filozofu ida-ne’ebé ko’alia mós buat ne’ebé Hegel ko’alia.

Teoria rekoñesimentu ne’ebé Honneth ko’alia, koñesidu ho teoria rekoñesimentu intersubjektif/entre-sujeitu. Honneth hatuur nia teoria ida-ne’e iha área tolu no área hirak ne’e sai pilar tolu recognition intersujektif/entre-sujeitu mak hanesan domin, direitu, no solidaridade. Pilar tolu recognition intersujektif/entre-sujeitu ida-ne’e, Honneth sita hosi pensamentu Hegel bainhira ko’alia kona-ba morál. Hanesan Hegel, Honneth mós tau atensaun makaas ba aspetu resiprokal morál ne’ebe atinji hosi auto-konsiénsia ba ita nia-aan. Ho konsiénsia, ita bele hatene ka rekoñese ita-nia aan nu’udar parte hosi mundu ida-ne’e. No hosi ida-ne’e, ita bele sente no hatene self restriction (pembatasan diri/limitasaun iha korelasaun no interasaun ho ema seluk iha faktus sosiál. Tanba ida-ne’e, relasaun resiprokal la limita ba ita-nia aan de’it (egosentrismu) maibé relasaun ho ema seluk iha sosiedade. Atu hametin no dezenvolve pensamentu hosi Hegel, Honneth aumenta aspetu psikolojia sosiál hosi George Herbert Mead. Tuir Honneth, aspetu psikolojia importante atu hatene kona-ba rekoñesimentu. Objetu hosi ida-ne’e, atu hasees teoria sosiál hosi karáteristiku metafiziku Hegel.

Recognition Ala Honneth

Iha nia livru The I in We: Studies in the Theory of Recognition, Honneth fó definisaun haat (4) kona-ba anerkenneung/rekoñesimentu. Primeiru, rekoñesimentu hanesan modelu klaim orijinál ne’ebé tau pontu inportánsia ba definisaun linguajen hanesan afirmasaun ba kualidade pozitivu ne’ebé sujeitu no grupu sira iha. Segundu, iha desizaun jerál katak rekoñesimentu la’ós de’it hanesan aktu ne’ebé ita espresa iha liafuan ka simbólu sira maibé hatudu no realiza iha aktu, tanba iha koherensia modelu hahalok bele kria kredibilidade normativu ne’ebé “signifikante”. Iha konteksu relasaun entre-sujeitu, rekoñesimentu sai espasu prinsipál “atance” (haltung), ne’ebé realiza iha aktu konkretu. Terseiru, rekoñesimentu hanesan aktu ne’ebé reprezentante diferensa fenomenu sosiál. Kuartu, rekoñesimentu tenke hatuur iha aspetu fundamentá tolu (3) mak hanesan domin, hak legal (direitu), respeita sosiál iha relasaun.

Tuir Honneth, rekoñesimentu hanesan mós tipu normativu hosi aktu (gerakan) emansipasaun iha sosiedade ne’ebé sujeitu ka grupu sira hala’o, no sujeitu ida-idak presiza espasu rekoñesimentu iha sosiedade atu hatene importánsia hosi rekoñesimentu ne’e rasik. Hanesan hateten ona iha leten katak, rekoñesimentu tenke hatur iha domin, direitu no solidaridade. Primeiru, domin hanesan medium/sentru rekoñesimentu iha no sujeitu hasoru no hetan iha sosiedade no iha ne’e sujeitu iha fiar-aan nu’udar sujeitu sosiál. Hanesan mós Hegel, Honneth hateten:

Thus, for Hegel, love represents the first stage of reciprocal recognition, because in it subjects mutually confirm each other with regard to the concrete nature of their needs and thereby recognize each other as needy creatures. In the reciprocal experience of loving care, both subjects know themselves to be united in their neediness, in their dependence on each other. Since, moreover, needs and emotions can, to a certain extent, only gain’ confirmation’ by being directly satisfied or reciprocated, recognition itself must posess the character of affective approval or encouragement (Honneth, 1995: 95).

Konseitu domin ne’ebé hatuur iha ne’e la’ós hanesan konseitu domin romantizmu sira-ne’ebé ko’alia to’o de’it liña seksualidade. Domin ne’ebé hatuur iha ne’e, hanesan relasaun entre amigu, relasaun entre inan no oan ne’ebé mai hosi fuan ne’ebé mós rekoñese nia oan nu’udar nia oan. Iha konseitu ne’e, Honneth diferensa ideia ho Hegel. Honneth uza teoria  psikoanalisis iha teoria sosiál iha kontestu rekoñesimentu. No tanba ida-ne’e, Honneth haree relasaun entre oan no inan la’ós to’o de’it iha kesatuan genetik maibe haree liu ba faktus relasionál hanesan baze objetivu ne’ebé kategoria iha rekoñesimentu hosi ema ida ba ema ida (timbal balik).

Segundu, depois haree domin hanesan baze mediu, direitu legal (hak legal) hanesan baze ida ne’ebé importante mós iha pensamentu rekoñesimentu Honneth. Tuir Honneth, individu ka ita ema hanesan sujeitu direitu ne’ebé hatudu hosi direitu no dever ema-nian, ne’ebé inplementa iha sosiedade ho justu. Direitu (hukum) menuntut kepatuhan, no tanba ida-ne’e iha rekoñesimentu entre sujeitu. Sujeitu ka individu no grupu hanesan sujeitu legál ne’ebé fó fatin (locus) no tempu (tempus) atu fornese ka hasulin direitu no dever iha sira-nia komunidade. Ida-ne’e, bazea ba norma-norma sosiál ne’ebé regula ona iha sosiedade ka nasaun ida. Iha ne’e, simplesmente Honneth atu dehan katak, penyatuan legal hanesan dinamiku rekoñesimentu ba sujeitu iha kategoria direitu ne’ebé hanesan no realiza iha realidade. Sujeitu hanesan agen autonomu ne’ebé iha nia direitu atu hetan rekoñesimentu no ida-ne’e hanesan dever ida-ne’ebé iha no tenke hetan. Se sujeitu ka individu la hetan rekoñesimentu iha direitu, iha ne’e mosu luta ba rekoñesimentu (strugle for recognition).

Terseiru, alende hosi domin no direitu legal (hak legal) individu ka sujeitu mós presiza rekoñesimentu sosiál ne’ebé permite no fó posiblidade ba sujeitu ka individu atu halo relasaun ho sujeitu seluk ho valor pozitivu. Rekoñesimentu sosiál haree liu ba rekoñesimentu karáteristiku konkretu, kapasidade sujeitu. Rekoñesimentu ida-ne’e la’ós bazea ba kargu, strata sosiál maibé tanba sujeitu nu’udar umanu no individu ne’ebé uniku espesiál ho nia karáteristika, kapasidade, no valor rasik. Simplesmente diferensa ne’ebé individu ka sujeitu iha tenke ita rekoñese hodi hetan armonia iha sosiedade.

Teoria rekoñesimentu Honneth, simplesmente atu hateten diferensa karáteristika, kapasidade, diferensa sosiál, polítika no diferensa iha aspetu hotu tenke iha rekoñesimentu. Importánsia hosi rekoñesimentu ne’e atu hetan armonizasaun iha sosiedade no polítika. Tuir Honneth, problema sosiál no polítika ne’ebé akontese iha sosiedade, mosu tanba disrespect/penghinaan. Sujeitu ka grupu la respeitu no la simu ema ka grupu seluk nia diferensa no nia rezultadu mak problema. Tanba ida-ne’e, tuir Honneth presiza rekoñesimentu entre-sujeitu, nu’udar sujeitu ne’ebé autonomia no uniku. Rekoñesimentu hanesan dalan ka xave atu rezolve ka evita problema sosiál no polítika ne’ebé iha; ne’ebé hatuur iha domin, direitu legal, no solidaridade.

Rekoñesimentu Prezente Natal & Tinan Foun 2021

Kada tinan, igereja selebra festa natal no tinan foun. Nu’udar sarani, ita hotu sempre husu ita-nia aan saida mak ita atu fó ba ita-nia família no ema sira-ne’ebé ita hadomi ka sempre husu ita-nia aan prezente  saida mak atu ita fó ba kosok-oan Jezus. Iha tempu Adventu, Igreja iha mundu tomak prepara nia-aan atu simu kosok-oan Jezús. Tempu adventu sai tempu preparasaun, tempu hamoos-aan ka tempu metanoia atu simu Jezús iha ita-nia fuan. Atu nune, ita bele hatene prezente saida mak atu ita fó ba kosok-oan Jezús no ba ita-nia família no maun-alin sira hotu iha sosiedade. Preguntas simples mai ita, sá prezente saida mak ita fó ba kosok-oan Jezús no ba ita-nia emar sira?

Nu’udar sarani, Jezús hanorin ita atu moris simples ne’ebé Nia hatudu ona mai ita iha Nia simplisidade moris iha bibi-luhan ka balada han fatin. Nia hanorin ita atu hadomi ita-nia inimigu no ita-nia emar sira hanesan ita-nia aan rasik, hanesan Nia hadomi ita. Ida-ne’e mak ukun-fuan dahuluk no aas liu. Seraké ita kumpre no halo ona ka lae? Se ita haree realidade ne’ebé akontese iha ita-nia moris, iha ita-nia sosiedade no nasaun, ita bele dehan katak ita seidauk kumpre no halo tuir saida mak Nia hanorin. Problema ka konflitu sosiál no polítika mosu iha ita-nia moris iha sosiedade no nasaun, aumenta no aumenta ba beibeik. Krime mosu iha fatin barak. Deskonfia, korrupsaun ita bele dehan mosu hosi nasionál tuun mai to’o baze. Impase polítika mosu iha tempu naruk nia laran. Tarata no hotar malu tan diferénsia polítiku no povu ai-leba mak sai vitima, nst. Realidade hirak ne’e hatudu momoos katak ita seidauk realiza saida mak ita tenke halo nu’udar sarani, iha sosiedade no nasaun ida-ne’e.

Preguntas simples ne’ebé ita presiza husu mak saida mak sala no laiha iha ita-nia aan, iha ita-nia hanoin no fuan nu’udar ema-ne’ebé iha fiar ba Maromak? Atu responde ida-ne’e, ho filozofu Axel Honneth ita refleta ita-nia aan ho rasosinu kritiku ho pensamentu rekoñesimentu. Se ita haree ho hanoin no reflesaun krítiku nu’udar animal rasionale ne’ebé fiar ba Maromak, ita-nia santa-kreda (ita nia relijiaun) hanorin ona ita atu hadomi malu nu’udar ita-nia aan rasik no hadomi ita-nia inimigu sira. Tuir ha’u-nia hanoin, ida-ne’e mak pontu kulminante hosi rekoñesimentu. Rekoñesimentu ne’ebé Axel Honneth hatuur, iha ita-nia santa-kreda no ita-nia relijiaun hanorin no hatuur ona mai ita. Problema sosiál no polítika mosu tanba ita seidauk hatuur ita-nia aan nu’udar ema-ne’ebé iha fiar. Ita seidauk iha rekoñesimentu iha sosiedade no iha palku polítiku no ida-ne’e mosu tanba iha disrespect (patologia sosial).

Se ita refleta liután bazea ba pensamentu Honneth, ita bele dehan, realidade patologia sosial (disrespect, problema sosial, politika, nst) mosu tanba defisit rasinalitas (hanoin la kle’an) ka ho liafuan hosi Roky Gerung dehan beik no mau-blaar. Tan defisit rasionalitas ita laiha kapasidade no hanoin ne’ebé kle’an, refletivu kritiku, atu hatene loloos no halo tuir saida mak ita-nia Nai Jezús, ne’ebé ita selebra nia loron moris (Santu Natal) hanorin mai ita liuhosi santa-reda nu’udar ema-ne’ebé iha fiar. Tan de’it defisit rasionalitas problema sosiál no polítika mosu nadodon. Diferensa polítika, diferensa ideia la’ós sai pontu autonomia hosi sujeitu no grupu ne’ebé tenke ita simu atu hariku ita-nia aan no sosiedade iha nasaun ida maibé sai caos ne’ebé hamosu problema impase no problema sosiál no políika no problema seluk tan.

Kada tinan, antes selebra loron Natal no Tinan Foun, ita-nia na’i-ulun sira sempre hato’o boas festas santu Natal no hatoo sira-nia rekursu no mensajen Natal ba povu tomak katak Natal tempu dame, natal tempu hadomi malu, nst. Ha’u sei lembra memória Natal tinan 2018, 2019, nai-ulun sira iha nia mensajen dehan, Natal tempu dame no domin. Tenke hadomi malu. Ida-ne’e hatudu mom’os Natal no Tinan foun tempu rekoñesimentu. Tenke simu malu nu’udar maun-alin. Maibé realidade, ba ha’u, buat hirak ne’e sai de’it mensajen sein aktu. Ho pensamentu Honnet karik “rekoñesimentu sein aktu”. Honneth dehan, rekoñesimentu tenke realiza iha aktu no hatuur iha domin, direitu legal, no solidaridade (karidade). Tanba falta rekoñesimentu sein aktu ne’ebé hatuur iha nia fondasaun tolu, mensajen Natal 2018, 2019, laiha rezultadu. Impase polítika, meza parlamentu to’o rahun, liafuan viola konstituisaun no problema seluk tan mosu naba-naban iha tinan 2020. Espera katak, tinan foun 2021, sai hanesan tinan rekoñesimentu no realiza iha aktu la’ós de’it liuhosi mensajen no rekursu natal sein realizasaun alias rekoñesimentu sein aktu.

Tinan 2018, 2019, 2020, ita bele dehan, tinan laiha rekoñesimentu iha sosiedade sosiál no polítika, no nia rezultadu mak impase polítika, meza parlamentu rahun no problema sosiál no polítika seluk tan ne’ebé atan ha’u la temi. Ida-ne’e hatudu ba povu, nasaun no mundu ida-ne’e hanesan rezultadu hosi ita-nia defisit rasionalitas. No tanba ida-ne’e, iha tempu Natal no Tinan foun 2021, mai ita hadia ita-aan, hasa’e no muda ita-nia mentalidade kritiku no matenek nu’udar ema-ne’ebé iha fiar atu rekoñese ita-nia aan no ita-nia ema sira. Se ita iha rekoñesimentu, ita bele simu sira-nia diferensa sosiál, polítika no seluk tan no hatuur bonum comune iha ita-nia moris nu’udar polítiku, nu’udar animal rationale ne’ebé fiar ba Maromak. No, ikus liu ita kuda rekoñesimentu iha ita fuan no hanoin, no hafutar rekoñesimentu hanesan prezente iha Natal 2020 no tinan foun 2021, ba kosok-oan Jezús no ba ita-nia emar sira, iha ámbitu sosiál polítika no seluk tan. No, rekoñesimentu tenke realiza iha aktu… #hafutar tinan 2021, hanesan tinan ba rekoñesimentu.#

Lian Maktaka

Iha lian mak taka ida-ne’e, atan ha’u atu husik de’it poezia ida hodi konklui artigu simples ida ne’e.

Hau sala uain no todan tebes, hau rekoñese idane’e//Ó mós sala uain, hau rekoñese idane’e/Nia, sala ua’in, hau rekonese idane’e//Imi, sira, ami, no ita hotu, sala uain, hau rekoñese idane’e//Ha’’u rekoñese hau sala no imi sala//Hau simu idane’e hotu hau sala, imi, sira, no ita hotu nia sala, hau simu satán itania diak tomak, hau sei simu no rekoñese to’o rahan laek//Idane’e mak prezente ba Nai Maksoin no ba imi hau maluk sira//. Boas Festas do Santu Natal 2020 no Tinan Foun 2021–#Tinan Foun 2021, Tinan Rekoñesimentu#

*) Hakerek-na’in Alumnus Filozofia UGM, Dosente Filozofia ISFIT; Referénsia foti hosi livru Politik Berdarah Timor Leste” ne’ebé nia hakerek no tuir planu livru ne’e sei lansa iha 2021.

HAKEREK NO HATÁN

Please enter your comment!
Please enter your name here