Ministru Asuntu Parlamentár no Komunikasaun Sosiál (MAPKOMS), Francisco Jerónimo. Imajen TATOLI/Egas Cristóvão

DILI, 28 dezembru 200 (TATOLI)—Ministru Asuntu Parlamentár no Komunikasaun Sosiál (MAPKOMS), Francisco Jerónimo, informa nia parte haruka ona naran kandidatu kargu Prezidente Agência TATOLI definitiva ba ezekutivu sira hodi diskute.

“Ha’u prosesu ona karta relasiona ho Prezidente definitiva ba Konsellu Ministru (KM) atu foti dezisaun ikus. Kadidatu ne’e ema ne’ebé hamutuk ho imi, atu lidera  imi ba oin,” Ministru Francisco hateten iha ámbitu enkontru jerál ho Agência TATOLI, iha Farol, segunda ne’e.

Iha loron 02 setembru 2020, MAPKOMS liuhosi despaisu nomea atuál Vise-Prezidente Asuntu Mídia no Jornalístiku, Manuel Pinto, ba Prezidente Agência TATOLI interinu hodi troka Prezidente sesante, José da Costa.

Notísia Relevante: MAPKOMS nomea Manuel Pinto ba Prezidente Agência Tatoli interinu

Ministru kompromete la kleur tan Prezidente definitiva ida sei iha atu lidera estrutura foun ba oin ho di’ak liután.

“Imi hein kleur ona, imi sempre hateten  lalais no lalais,  ne’ebé  ha’u mós dehan lalais, maibé tenke iha prosesu tanba ha’u mós tenke haree. Tanba ne’e la kleur tan ha’u hein katak Kosellu Ministru iha loron 30 dezembru agora bele aprova ona ou se labele iha Konsellu Ministru tinan oin bele aprova ona atu nune’e bele fó pose Prezidente foun lidera estrutura foun,” nia akresenta.

Ministru dehan, nia parte lakohi halo nomeasaun ema li’ur mai lidera estrutura Agência TATOLI.

“Hau deklara ho klara ba ita bo’ot sira katak  ha’u la lori ema mai husi li’ur, lalika lori ema mai husi liur mai, tama iha ne’e tanba ha’u  mós lakohi atu inventa sasán, ha’u atu ba buka ema li’ur ne’e bele maibé ha’u lakohi,” nia hatutan.

Nia haktuir, dalaruma funsionáriu mídia Estatál ne’e sente katak kargu interinu labele halo knaar hanesan bain-bain maibé iha funsaun balun ne’ebé mak bele halo.

“Tuir loloos ita haree ba regra, entaun Prezidente interinu mós bele, so que iha buat balun maka presiza haree,  entaun la kleur tan ita bo’ot sira iha Prezidente permanente iha ona maibé ha’u dehan buat hotu tenke la’o iha prosesu nia laran hotu no presiza avalia serbisu ne’ebé maka iha,” governante ne’e salienta.

Prezidente sesante submete karta rezignasaun ba MAPKOMS iha loron 03 agostu 2020 no husik kargu ne’e iha loron 31 agostu.

Iha loron 5 dezembru 2018, José da Costa nomeadu nu’udar Prezidente Konsellu Diretivu Agência Notisioza Timor-Leste, TATOLI ba mandatu tinan-haat liuhosi desizaun Konsellu Ministru no liuhosi diploma ministeriál Sekretaria Estadu Komunikasaun Sosiál (SEKOMS) nomea Vise-Prezidente Manuel Pinto no Olandino da Costa.

José da Costa simu pose iha 21 dezembru 2018, hahú knaar iha inísiu janeiru 2019.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here