Estudante mileniál hosi Eskola Sekundária Jerál Públika 4 Setembru Liceu Viqueque, Julito Miguel, prodús manual aviaun ida. Imajen TATOLI/Memensio Sequeira Freitas.

VIQUEQUE, 28 dezembru 2020 (TATOLI)—Diretór Ensinu Sekundáriu Jerál Públiku (ESGP, sigla portugés) 4 de Setembru Viqueque, Verissimo Marques da Silva, hateten nia parte sente kontente tebes tanba ninia estudante sira be envolve aan iha Liceu Science Group (LSG) ne’e fó ona rezultadu ótimu tebes hodi hamorin eskola ne’e nia naran iha nasionál.

Notísia Relevante: Estudante mileniál hosi Viqueque prodús aviaun

“Nu’udar diretór hosi eskola ida-ne’e, hamutuk ho mestre sira hotu, ami sente orgullu tanba ami-nia estudante sira bele hetan prestasaun di’ak ne’ebé sira hatudu ona liu hosi komemorasaun Loron Mundiál ba Siénsia no Matemátika tinan tolu tuituir malu. Hosi prestasaun sira-ne’e, ami-nia alunu ida naran Julito Miguel sai viral iha mídia sosiál tanba talentu naturál ne’ebé nia iha, hodi hamorin eskola ne’e nia naran iha nasionál,” Verissimo Marques hateten ba kontribudór Agência TATOLI iha nia knaar fatin, Viqueque, foin lalais ne’e.

Edifisiu ESG 4 de setembru Viqueque. Imajen TATOLI/Memensio Sequeira Freitas.

Tanba ne’e, nia hatutan, nia husu ba Estadu no Governu Timor-Leste liuhosi Ministériu Edukasaun Juventu no Desportu (MEJD) atu tau matan nafatin ba Ensinu Sekundáriu 4 de Setembru Viqueque, liuliu ba materiál didátiku no laboratóriu nian atu estudante no profesór/a sira bele uza iha prosesu ensinu no aprendizajen.

Iha tinan ida-ne’e, diretór eskola ne’e hateten, Liceu Science Group (LSG) hatudu nia prestasaun di’ak iha tinan ida ne’e (2020) sai grupu manan-na’in ba tópiku neen (6) mak hanesan Produsaun Jís, mákina dulas kafé, mákina behu batar, mákina ko’a fehuk-europa ka señoura, mákina manuál ko’a kripik no robot simples ida.

“Hosi tópiku hirak nee’e,  bainhira partisipa iha eventu loron mundial siénsia ne’ebé realiza iha Centro Laboratóriu Nacional KNTLU-SESIM EBC 30 de Agosto Dili iha data 24-27 Novembru 2020. Iha espozisaun refere, LSG nia tópiku rua (2) mak hetan favóritu hosi tópiku ualu (8) seluk hosi eskola seluk. Hosu produsaun LSG nian, tópiku Mákina Ko’a fehuk-europa ka señoura hetan apresiasaun hosi UNICEF no tópiku kona-ba mákina dulas kafé hetan apresiasaun hosi Minestério Agrikultura,” nia informa.

LSG partisipa iha World Science Day iha Dili (2020). Imajen TATOLI/Memensio Sequeira Freitas.

Iha tinan ida-ne’e, nia haktuir, sai nu’udar orgullu boot ba Liceu Sciens Group (LSG) tanba hetan fiar hosi Komisaun Organizadora ba Komemorasaun Aniversáriu Loron Independénsia RDTL ba dala-45 iha Munisípiu Viqueque, tanba fó fiar ba grupu ida-ne’e hatudu demonstrasaun siénsia ho tópiku “Roket Bee” no hatudu mós espozisaun tópiku neen (6) nu’udar manan na’in, ne’ebé iha oportunidade ne’e hetan mós vizita hosi Sekretáriu Estadu Joventude no Desportu, autoridade munisípál, estudante no komunidade sira.

Entretantu, Profesora Matadalan ba Licei Science Group (LSG), Octavia Alves, hatetetn LSG nu’udar grupu ida-ne’ebé sai hanesan motivasaun ba estudante sira atu hatudu sira-nia matenek, kreatividade no inovasaun ne’ebé ikus mai hatudu katak grupu ida-ne’e sai tebes fatin atu habelar siénsia.

“Ha’u espera katak iha futuru grupu ida-ne’e bele sai ezemplu ba eskola seluk iha munisípiu Viqueque nia laran tomak. Importante mós ba profesór sira oinsá bele organiza estudante sira tanba estudante sira iha ona talentu naturál, nune’e profesór sira-nia papel importante tebes atu fasilita sira liuhosi siénsia ne’ebé iha,” nia dehan.

Iha fatin hanesan, Prezidente Atuál Liceu Science Group (LSG), Felicia Edia de Sousa, haktuir nia sente orgullu tanba LSG sai tebes fatin ba sira atu duni sira-nia mehi ba sira-nia aan rasik.

“LSG hanesan matadalan ida atu hakle’an ami-nia koñesimentu kona-ba siénsia,” estudante ne’e haktuir.

Ezisténsia hosi Liceu Science Group (LSG) iha ESGP 4 de Setembro Viqueque, nia dehan, fó ona motivasaun ba sstudante sira hotu partikularmente Munisipiu Viqueque no jeralmente Timor-Leste laran tomak. Liceu Sciense Group (LSG) hamorin ona eskola refere nia naran iha fatin-fatin.

“Hosi Science group ne’e rasik hamosu talentu naturál sira hanesan ita hotu hatene Estudante “Julito Miguel“ ne’ebé agora daudaun viral iha mídia social hodi halo ema hotu preokupa inklui governante sira kona-ba produsaun avioneta elikópteru simples ida. Aleinde Julito Miguel, iha estudante lubuk mak iha koñesimentu no kapasidade di’ak, balun agora estuda hela iha universidade no seluk mós nu’udar estudante ativu iha eskola ida-ne’e. Fiar katak LSG  sei buras ba beibeik ho nia atividade prátika sira no sei hamosu talentu naturál ke ita la espera,” nia haktuir.

Liceu Science Group

Ekipa LSG partisipa iha WSD Venilale 2018. Imajen/Espesial.

Liceu Science Group (LSG) katak grupu siénsia hosi estudante ho profesór  ne’ebé eziste  iha Ensinu Sekundáriu Jeral Públiku 4 de Setembro Viqueuque. Grupo Siénsia ida-ne’e hetan legalizasaun hosi Diretór Eskola ESGP 4 de Setembru Viqueque, Verissímo Marques da Silva, iha 15 outobru 2018 iha serimónia tomada de pose ba estrutura Matadalan LSG hosi Profesór sira  no Estrutra ba Membru LSG hosi estudante ne’ebé asiste direta hosi Diretór Edukasaun Munisíipio Viqueque, Emidio Amaral, no akompanha mós hosi Reprezentante KNTLU-SESIM, Luis Nivio.

Razaun tau data 15 outobru 2018 hanesan loron moris ba grupu siénsia ida-ne’e, tanba iha loron refere mak profesór no estudante sira liuhosi enkontru dahuluk realiza diskusaun ne’ebé naruk tau grupu ida-ne’e nia naran “Liceu Science Group” ka habadak LSG.

Liceu Science Group (LSG) iha ninia simbólu rasik mak hanesan simbólo siénsia hosi área oioin iha kabuar nia laran ho nia sentidu mak hanesan lampu kabuar signifika mundu, no naroman ne’ebé sai hosi lampu katak siénsia ba ema tomak iha mundu, DNA reprezenta karáteristika umana hosi siénsia Biolojia, valor=3,14 reprezenta siénsia Matemátika, E=m.g.h reprezenta siénsia Fízika, Globe  reprezenta siénsia Jeolojia,  no Átomo reprzsenta siénsia Kímika.

Grupu siénsia ida-ne’e  iha ninia lema  rasik  “The science of today is techonology  of tomorrow“. Liafuan murak ida-ne’e mai hosi  sientista fízika ida ho naran Edward Teler, ne’ebé koñesidu kona-ba bomba idrojénio. Liafuan ida-ne’e, inspira duni estudante no profesór  nia hanoin ne’ebé ikus mai difine ba lema Liceu Science Group (LSG). Katak, atu hamosu teknolojia ida ninia baze fundamental mak siénsia. Tanba ne’e, aprende siénsia hahú agora no sei hamosu  teknolojia iha futuru.

Enkontru dahuluk ba formasaun LSG. Imajen/Espesial.

Objetivu prinsipál  hosi Liceu Science Group (LSG) mak oinsá bele organiza atividade oioin ne’ebé iha relasaun ho siénsia no matemátika  hodi bele promove, fó motivasaun ba Estudante sira atu haklean koñesimentu no fó biban ba estudante ida-idak identifika issue ne’ebé iha relasaun ho siénsia no matématika hodi bele kompete iha mundu globalizasaun ka mundu teknolojia oras ne’e daudaun no ba oin.

Liceu  Science Group (LSG) iha ninia misaun importante mak  promove,  inisiativa, partisipa no habelar siénsia  no matemátika hosi estudante ba ema hotu. Vizaun  Liceu Science Group (LSG)  mak  nu’udar “Fatin aprende siénsia hodi lori Escola ESG 4 de Setembru Viqueque ba mundu liuhosi siénsia  no matemátika”.

Liceu Science Group (LSG) iha ninia regulamentu rasik oinsá atu sai membru tenke liuhosi  prosesu ida-ne’ebé mak estudante sira tenke prenxe bainhira estudante refere hakarak dedika nia aan nu’udar membru Liceu Science Group (LSG). Estudante tenke tuir rekezitu mak hanesan tenke hatama tópiku prátika ida hodi aprezenta ba estrutura LSG no hetan aprovasaun hosi profesór siénsia teknolojia nu’udar matadalan LSG.

Razaun simples ne’ebé sai baze fundamentál no inspira tebtebes Estudante no Profesór sira iha ESGP 4 setembro  Viqueque atu hamosu Liceu Science Group (LSG)  liuhosi atividade oioin mak hanesan iha 2015, Komisaun Nasionál Timor-Leste ba UNESCO ( KNTLU) liuhosi nia divizaun SESIM realiza aktividade prátika atu kapasita profesór sira iha área Matemátika, fízika, kímika, Biolojia no jeoljia iha ESGP 4 de Setembro Viqueque.

Iha tinan 2017 hetan konvite hosi KNTLU-SESIM, eskola haruka ekipa ida ba nu’udar partisipante ba eventu komemorasan Loron Mundial Siénsia iha Railaco-Ermera. Liuhosi eventu loron mundiál refere hafanun ona estudante no profesór sira hotu, hamosu mós pergunta boot relasiona ho eventu ida-ne’e. Katak, tanbasá eskola seluk bele hatudu atividade prátika no sira labele?

Atu responde ba pergunta ida-ne’e mak profesór sira-ne’ebé mak hanorin matéria siénsia teknolojia komesa halibur malu, fó hanoin ba malu no motiva malu katak atividade espozisaun ne’ebé KNTLU-SESIM hala’o ne’e interesante tebe-tebes no tanba ne’e labele sai de’it nu’udar grupu partisipante iha eventu ne’e maibé bele mós hola parte nu’udar grupu manan-na’in iha espozisaun sira tuir mai. Hahú hosi ida-ne’e, profesór sira komesa identifika ona estudante ne’ebé iha kapasidade no prestasaun di’ak hodi halibur iha grupu ida atu bele hala’o prátika siénsia nian. Grupu ne’e atu sai fatin no sai mós motivasaun ne’ebé interesante tebe-tebes no fasil ba profesór sira kontrola ikus mai hamosu duni grupu siénsia ida ho naran Liceu Science Group (LSG).

Hahu husi estabelese Liceu Science Group (LSG), Estudante sira hatudu sira-nia kapasidade, kreatividade no mehi ne’ebé aas atu kompete iha kompetisaun hakerek prátika  siénsia no matemátika ne’ebé establesa hosi KNTLU-SESIM iha atividade espozisaun ne’ebé realiza iha kada tinan.

Hafoin ezisténsia LSG iha ESGP 4 de Setembru Viqueque, dezenvolvimentu parátika siénsia no matemátika positivu tebe-tebes. Realidade ne’ebé fó prova mak LSG iha tinan 2018 envolve kedas iha atividade atu komemora World Science Day ne’ebé realiza espozisaun siénsia no matemátika hosi KNTLU-SESIM iha Postu Admnistrativu Venilale. Municipio Baucau, no lori grupu ida-ne’e nu’udar manan-na’in ba tópiku prátika neen (6) mak hanesan: Elikópteru Liceu, CCTV Liceu, Kaiñaun, Matemátika iha Arloji, Gas Espidol no Vulkaun no Korente Konvesaun.

Hosi tópiku hirak ne’e, tópikou tolu (3) mak sai nu’udar tópiku favóritu mak Vulkaun no Korente Konvesaun hetan apresiasaun hosi IPG, Elikópteru Liceu hetan apresiasaun hosi parte Edukasaun no Kaiñaun hetan apresiasaun hosi Conoco philips.

Estudante mileniál hosi Eskola Sekundária Jerál Públika 4 Setembru Liceu Viqueque, Julito Miguel, prodús Mákina Ko’a Kripik no Mákina Dulas Kafé. Imajen TATOLI/Memensio Sequeira Freitas.

Liu tiha ida ne’e, iha tinan 2019 nudar mós manan nain ba tópiku hat (4) mak hanesan Pestisida Orgánica, Mákina dulas Nuu, Kereta api (komboiu) no Enerjia Iólika, Formasaun Mina iha Rai Okos. Tópiku hirak ne’e bá aprezenta tan iha ámbitu  komemora World Science Day ne’ebé realiza iha Munisípiu Same, Manufahi. Hosi tópiku hirak ne’e, bainhira aprezenta iha espozisaun World Science Day, tópiku Pestisida Orgánika betan apresiasaun hosi parte akadémiku nu’udar tópiku favóritu iha tinan 2019.

Aleinde ida-ne’e, Liceu Science Group (LSG) mós hatudu ona demonstrasaun ba atividade prátika siénsia iha eskola rasik no  iha munisípiu. Iha loron 28 fulan novembru tinan 2018 halo demonstrasaun Tiru Kaiñaun no husik Elikópteru semo ne’ebé sai sentru interesante tebe-tebes hosi partisipantes sira iha kampu Demokasia Viqueque. Iha momentu ne’e mós hetan apresiasaun hosi Ministru Transporte no Telekomunikasaun. Iha tinan 2019, Liceu Sciens Group (LSG) lori ESGP 4 de Setembru Viqueque ho tópiku prátika oioin hola parte iha espozisaun Munisípiu Viqueque hodi simu vizita hosi Prezidente Repúblika Demokrátika Timor-Leste, Francisco Guterres Lú-Olo.

Notísia Relevante: Estudante brillante Julito Miguel mehi hakarak sai pilotu

Kontribuidór: Memensio Sequeira Freitas

Editór: Cancio Ximenes

HAKEREK NO HATÁN

Please enter your comment!
Please enter your name here