Xefe Seksaun Invesigasaun Kriminál hosi Komandu Polísia Distritál Ainaro, Armindo do Rosário Araújo. Imajen espesiál

AINARU, 26 dezembru 2020 (TATOLI)–Xefe Seksaun Invesigasaun Kriminál hosi Komandu Polísia Distritál Ainaro, Armindo do Rosário Araújo, informa joven hamutuk na’in-sia asalta motór tolu rezulta joven na’in-ida ho naran Elídio Delima Sarmento Pacheco (19) hakotu ninia iis.

Akontesimentu ne’e akontese iha Aldeia Tatiri, Suku Mulo, Postu Administrativu Hatubuilico, Munisípiu Ainaro, hafoin natal iha 24 dezembru kalan, maizumenus tuku rua madrugada.

“Depois misa iha igreja Dare, vítima ho nia maluk na’in-lima ba kaer liman ho nia família sira iha Dare no sira kontinua ba vizita tan família sira iha Aituto. Bainhira sira hakat sa’e bá, sira haree ema túr ho kondisaun lanu no tolok sira. Hafoin sira liutiha, suspeitu sira hein sira iha kafé laran. Maizumenus oras-ida hanesan ne’e, sira filamai no suspeitu sira asalta kedas no rezulta joven ida mak mate hafoin lori ba ospitál,” Armindo Araújo, ba Agência TATOLI, iha nia servisu fatin, Komandu Polísia Distritál Ainaro, ohin.

Elídio Delima Sarmento Pacheco ho kondisaun kanek iha ulun. Imajen espesiál

Armindo haktuir katak vítima ho nia maluk na’in-lima ne’e ho motór hotu. Motór ida, na’in-rua mak sa’e. Iha ámbitu asaltu ne’e, vítima mate tanba nia halai depois monu no baku kona nia-ulun iha baleta hafoin suspeitu na’in-sia baku to’o grave, depois lori bá ospitál maibé la konsege salva nia vida.

“Suspeitu na’in-sia hein sira iha kafé-laran. Liu tiha oras ida, vítima sira tún mai, suspeitu sira halo kedas asaltu ba sira no baku ho ai. Na’in-rua konsege halai no na’in-haat monu latan iha ne’ebá. Hosi na’in-neen ne’e ida halai mak monu depois baku nia ulun iha baleta, hafoin suspeitu sira aproveita baku to’o grave depois lori ba ospitál maibé la konsege salva nia vida,” nia hatutan.

Suspeitu sira ne’ebé deskonfia hakotu Elídio Delima Sarmento Pacheco nia vida. Imajen espesiál

Entretantu, Armindo informa katak suspeitu na’in-sia oras ne’e iha ona sala detensaun Komandu Polísia Ainaro.

Xefe Investigadór Polisiál afirma katak prosesu investigasaun sei la’o hela, maibé aban ka bainrua sei aprezenta kazu ne’e ba Ministériu Públiku hodi submete ba tribunál atubele efetua primeiru interrogatóriu judisiál.

Kazu ne’e akontese tanba karik deskonfia konfrontu arte marsiál, Xefe Investigadór rejeita, tanba ema la uza farda arte marsiál maibé sira ho kondisaun lanu mak halo konfrontasaun.

Jornalista:  Zezito Silva

Editór: Xisto Freitas

HAKEREK NO HATÁN

Please enter your comment!
Please enter your name here