Laureadu Prémiu Nobel da Paz, José Ramos Horta, huu lilin aniversáriu ba dala-71. Imajen TATOLI/Domingos Piedade Freitas.

DILI, 26 dezembru 2020 (TATOLI)–Espoza Primeiru-Ministru, Isabel Fereira, hateten Xefe Governu Taur Matan Ruak hato’o parabéns ba Laureadu Prémiu Nobel da Paz, José Ramos Horta, ne’ebé mak selebra ninia aniversáriu ba dala-71 (26 dezembru 1949-26 dezembru 2020).

Espoza Primeiru-Ministru, Isabel Fereira, no Laureadu Prémio Nobel da Paz, José Ramos Horta, selebra aniversáriu Horta nian ba dala-71 iha Komunidade Cristo de Betania, Culau, Becora, Dili. Imajen TATOLI/Domingos Piedade Freitas.

“Ohin, Primeiru-Ministru la bele marka prezensa iha aniversáriu Ramos Horta nian ba dala-71, tanba okupadu uitoan ho serbisu balun. Maske nune’e, Xefe Governu hato’o nafatin nia parabens liuhosi prezente oan ida hodi fó ba José Ramos Horta,” Esposa Primeiru-Ministru, Isabel Fereira, ba Agência TATOLI bainhira partisipa iha selebrasaun aniversáriu Laureadu Prémiu Nobel da Paz ba dala-71 iha Comunidade Cristo de Betania, Culau, Becora, Dili, sábadu ne’e.

Nia hatutan, Primeiru-Ministru hakarak dala ida tan hato’o parabens ba José Ramos Horta ne’ebé mak respeita no iha relasaun ne’ebé amizade ne’ebé mak di’ak tebe-tebes. Tanba ne’e, husu bensaun Nai Maromak nia atu haraik grasa isin di’ak nafatin no matenek ba José Ramos Horta.

Iha biban hanesan, Pe. Mateus Tavares hosi Comunidade Cristo de Betania mós fó nia parabéns ba Laureadu Prémiu Nobel da Paz, José Ramos Horta, ne’ebe mak selebra loron aniversáriu ba dala-71.

“Tamba ne’e, ami husu ba Aman Maromak atu haraik nafatin vida naruk no saude di’ak ba maun boot. Dala ida tan fó ami-nia votu parabens no feliz natal ba avó Horta,” nia hateten.

Jornalista: Domingos Piedade Freitas

Editór: Cancio Ximenes

1 KOMENTÁRIU

  1. Parabens ba maun Ramos, figura neutra no ezemplar iha Timor-Leste. Husu boot ba Maromak atu harak isin di’ak nafatin no moris naruk ba Maun.

HAKEREK NO HATÁN

Please enter your comment!
Please enter your name here