Selebrasaun eukaristia iha igreja Paroquia Laleia, munisípiu Manatuto, sesta (25/12). Imajen TATOLI/Antónia Gusmão

MANATUTO, 25 dezembru 2020 (TATOLI)—Loron 25 dezembru sai hanesan tradisaun ba ema katóliku  hotu, hanesan mós iha Timor-Leste ne’ebé maioria ho relijiaun ne’e, kada tinan selebra loron boot ne’e ho eukaristia iha igreja ida-idak.

Nune’e mós, selebrasaun eukaristia iha igreja Paroquia Laleia, munisípiu Manatuto prezide husi Padre Pároku, Miguel Grilho, akompaña mós hosi padre konselebrante seluk.

 Tuir Padre Miguel Grilho, Natál presiza prepara mós fuan no perdua malu hodi sai di’ak liután iha tinan foun tuir mai.

“Iha Natál la’ós prepara de’it buat foun hanesan roupa foun, rona múzika no hemu tua, maibé prepara mós fuan hodi perdua malu, fahe domin no haksolok ho ema hotu, labele hirus malu, tanba Natál lori dame no domin liuhosi kosok-oan Jesus ne’ebé mak moris iha fatin simples maibé nia moris mai atu soin ita,” Padre Miguel Grilo hateten liuhusi omília bainhira prezide Misa Natál iha Igreja Paroquia Nossa Senhora do Rosária Laleia, sesta ne’e.

Buat hirak ne’e mak Amu lulik ne’e konsidera ladún di’ak tanba laiha dame, domin no haksolok, nakonu ho hanoin aat, maibé ho prezensa Nai Jesus maka bele hamoos no lori salvasaun ba ema hotu.

Nia konsidera Jesus nia domin halo ema sai ida de’it no hamutuk hodi fó domin ba malu liuhosi fuan moos no haksolok ho ema seluk.

“Ho fiar de’it iha Nai Jesus nia grasa atu ita hakribi ita-nia sala no filafali ba Nai Maromak. Ema seluk bele halo aat no ko’alia aat ita, maibé ita-nia fuan laran labele fila ko’alia hasoru sira no ita nafatin hakbesik-an ba sira hodi ko’alia di’ak,” nia akresenta.

Liuhosi biban ne’e, Amu Pároku ne’e husu ba Laleia-oan sira atu respeita malu, perdua malu kria dame no pás tanba Jesus nia domin boot tebes.

Padre Miguel kestiona tanba iha selebrasaun Misa Natál ema barak mak ba misa maibé iha loron bain-bain no domingu ema laiha.

Selebrasaun misa iha Igreja Laleia ne’e la’o ho ritmu hakmatek tebes no iha ámbitu ne’e hetan mós seguransa husi Polísia eskuadra Laleia.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here