Ministra Saúde, Odete Maria Freitas Belo. Imajen Tatoli /Egas Cristovão

DILI, 24 dezembru 2020 (TATOLI)—Ministériu Saúde, iha loron 24 fulan-dezembru ne’e halo ona distribuisaun máskara ba Igreja sira iha Kapitál Dili, hodi halo prevensaun ba moras coronavirus.

“Ami ohin enkontru ho Ministériu relevante sira hanesan Ministériu  Interniór, Polisia Nasionál Timor-Leste, Agua no Saneamentu orsida (kinta red ) hala’o servisu iha idaidak nia parte tanba parte Ministériu Saúde nian mak armazena ekipamentu protesaun pesoál nian no ami deside katak atu halo distribuisaun  máskara ba igreja sira,’ dehan Ministra Saúde, Odete Maria Freitas Belo hafoin halo enkontru ho liña ministeriál, sira iha SAMES-Kampung Alór Dili, kinta 24/12.

Notísia Relevante :MS enkoraja sidadaun mantein uza máskara prevene surtu COVID-19

Tuir planu MS sei distribui máskara hirak ne’e ba sarani sira iha Parókia Comoro, Ai-mutin, Motael, Katedral Dili, Becora, Bedois, Balide no seluk tan.

Iha fatin hanesan Vise Ministru Interiór, António Armindo, informa nia parte maka responsabiliza ba prosesu distribuisaun máskara ba Igreja sira.

Entretantu, Padre Parókia São José Ai-mutin, Emanuel Lelo Talok, C.M.F, hateten parókia Ai-Mutin simu ona máskara husi Ministériu Saúde hamutuk rihun 4.

“Ita simu ona máskara rihun 4 husi Ministériu Saúde tanba ne’e sarani hotu-hotu tenki uza máskara hodi halo prevensaun ba moras COVID-19,” Amu Paróku Ai-Mutin ne’e dehan durante selebrasaun misa kalan natal iha Ai-Mutin Dili.

Notísia Relevante :MI distribui máskara 10.000 iha liña fronteira

 Jornalista : Felicidade Ximenes

Editór:Agapito dos Santos