DILI, 24 dezembru 2020 (TATOLI)—Vise Ministru Interiór, António Armindo, hateten Governu foti desizaun taka provizóriu Aeroportu Internasionál Prezidente Nicolau Lobato no Fronteira Terrestre relasiona ho kazu COVID-19 ne’ebé Timor-Leste daudaun ne’e rejistu hamutuk kazu pozitivu 9.
Governu sei loke filafali movimentu ema no sasán iha Aeroportu no Fronteira iha fulan-janeiru 2021.
Notísia Relevante :MS deteta tan Timoroan na’in hitu hetan COVID-19 pozitivu
“Ita haree tok kazu ne’e la hatene aban bainrua sa’e ka tun entaun ida ne’e fó espasu ba ita semana rua hodi haree tok dezenvolvimentu ne’e kazu sa’e ka lae depois semana rua ita haree filafali nia medidas ne’e oinsá ,” dehan nia iha SAMES Kampung-Alor, kinta 24/12.
Ministériu Interiór husu ona apoiu ba FALINTIL-Forsa Defeza Timor-Leste (F-FDTL), atu reforsa servisu patrullamentu Polisia Unidade Fronteira (UPF) hodi prevene ema tama no sai fronteira ho dalan ilegál.
“Seguransa sira iha Fronteira Motain forsa sira ne’ebé mak desloka no apoiu iha ne’ebá durante ne’e kontinua apoiu Unidade Patroliu Fronteira no ita husu ona ba FFDTL mós apoiu tan hodi alerta no hasae vesibilidade hodi prevene ita-nia movimentu ilegál iha fronteira,” tenik tan.
Notísia Relevante :TL presiza aplika vijilánsia populár iha fronteira
Jornalista : Felicidade Ximenes
Editór :Agapito dos Santos
