Prezidente Partidu CNRT Kay Rala Xanana Gusmão, hasai foto hamutuk ho estrutura partidu refere, hafoin reuniaun alargada iha Hotel Novo Turizmu, Dili, kuarta ne'e. Imajen TATOLI/Evaristo Soares Martins.

DILI, 23 dezembru 2020 (TATOLI)—Prezidente partidu Congresso Nacional de Reconstrução de Timorense (CNRT), Kay Rala Xanana Gusmão, hala’o enkontru ho estrutura partidu refere hodi diskute mapeamentu polítika ba tinan 2021.

Imajen TATOLI/Evaristo Soares Martins.

“Iha reuniaun alargada ne’e diskute planu partidu ninian ba tinan 2021 no halo mós avaliasaun ba lala’ok partidu ninian 2020 ba kotuk. No, diskute asuntu importante liu mak mapeamentu polítika partidu CNRT ninian iha nível territóriu nasionál ne’ebé aprezenta hosi munisípiu 12 no RAEOA no mós organizasaun polítika sira hotu iha 2021,” Adjuntu Sekretáriu Jerál no Sekretáriu Ezekutivu Partidu CNRT, Jacinto Rigoberto, ne’ebé akompañadu hosi Prezidente CDN, Dionísio Babo Soares, informa liuhosi konferénsia imprensa, iha Hotel Novo Turizmu, kuarta ne’e.

Nia akresenta, mapeamentu polítika ne’e mós diskute kona-ba dezáfiu no progresu sira-ne’ebé mak partidu CNRT enfrenta durante ne’e sai hanesan programa ne’ebé mak sei lori ba debate iha konferénsia nasionál ne’ebé mak sei deside bainhira konferénsia sub-nasionál ne’e finaliza.

“Dezafiu ne’e internál partidu ninian maibé ne’e la’ós dezafiu partidu CNRT mesak hasoru maibé dezafiu ne’e partidu hotu-hotu sempre hasoru,” nia hateten.

Adjuntu Sekretáriu Jerál Partidu CNRT ne’e fó-sai katak, hosi diskusaun sira-ne’e hotu partidu foti desizaun atu konvoka konferénsia sub-nasionál iha Timor laran tomak iha 2021 hafoin hakat ba konferénsia nasionál.

Nune’e mós planu halo kalendarizasaun partidu ninian ba konferénsia sub-nasionál, ne’ebé estrutura munisípiu sira hato’o mai ba Konsellu Diretiva Nasionál (CDN-sigla portugés) no Komisaun Polítika Nasionál (CPN-sigla portugés) kona-ba atu tún ba halo konferénsia sub-nasionál.

Bainhira CDN no CPN simu munisípiu sira-nia kalendáriu hafoin deside bazea ba planu ne’ebé sira aprezenta sa’e mai hodi deside kalendáriu atu tún ba konferénsia sub-nasionál tanba Prezidente Partidu rasik hakarak atu partisipa iha konferénsia sub-nasionál ne’e.

“Diskusaun alargada ne’e mós prepara-aan atu hasoru kualkér eleisaun,” Adjuntu Sekretáriu Jerál Partidu CNRT ne’e hateten.

Iha reuniau alargada ne’e lidera hosi Prezidente Partidu CNRT, Kay Rala Xanana Gusmão, CDN, CPN, Juventude partidu CNRT, koordenadór munisipál sira no organizasaun partidu CNRT nian.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here