Aserbispu ba arkedioseze metropolitana Dili, Don Virgílio do Carmo da Silva. Imajen Tatoli/António Gonçalves.

DILI, 24 dezembru 2020 (TATOLI)—Arsebispu Arkedioseze Metropolitana Dili, Don Virgílio do Carmo da Silva, SDB, hateten selebrasaun Natal ne’ebé loos mak haktuir de’it ambiente Jezús nia moris iha Natál ba dahuluk nian.

Bispu Dioseze Dili ne’e haktuir, kosok-oan maksoin, husik nia isin tama iha ita-nia fuan no tama iha ita-nia moris. Amu Bispu esplika, sarani hotu hatene katak Jezús la moris iha ambiente ida-ne’ebé hanesan ambiente ne’ebé ema goza buat hotu-hotu ka ambiente ne’ebé ema gasta buat hotu-hotu tuir ema-nia hakarak.

Maibé, nia hateten, Jesús nia moris iha fatin mukit ida, fatin ki’ak ida iha rai Belem. Tan ne’e, nia dehan, Amu Papa konvida ema hotu dehan sarani sira iha tempu pandemia COVID-19 ida-ne’e, karik ita labele selebra Natál hamutuk hanesan kada tinan ita selebra hamutuk.

“Ita koko atu selebra Natál ne’e didi’ak lori ita ba fila-fali Natal dahuluk wainhira São José no Nain Feto buka hela fatin atu kosok-oan ne’e bele moris. Atu hetan de’it fatin oan ida mós defísil. Pobreza ida extremu no ida-ne’e mak loos duni sentidu Natal ne’ebé loos, ida-ne’e mós bele sai opurtunidade ba ita atu fila-fali ba ninia orijen Natal ne’ebé loos,” Arsebispu Aledioseze Metropolitana Dili, Don Virgílio do Carmo da Silva, SDB, haktuuir iha ninia omilia iha selebrasaun misa Natal nian iha Igreja Katedrál, Dili, kinta kalan.

Amu Bispu Virgílio haktuir, profeta Isaias ne’ebé dehan povu ne’ebé iha nakukun laran haree naroman boot ida tu prepara-aan ba Natal, ne’ebé dalaruma ema hotu preokupa ho barak atu halo Natal ne’e furak.

“Ita preokupa ho hatais, ita preokupa ho hahaan, ita preokupa ho dekorasaun, ita preokupa fatin katak ita atu paseiu (rekreasi) loos iha-ne’ebé. Dalabarak ita konsidera Natal hanesan feriadu, ema balu konsidera Natal ne’e festa bainbain ida, no hirak ne’e mak dalaruma ita sei dehan ita selebra Natal maibé sei iha nakukun boot ida. Maske nakukun maibé ita buka atu deskobre naroman ida-ne’e,” nia dehan.

Ho preokupasaun ne’ebé sarani hotu preokupa, tuir nia, mak Maromak halakon tiha ona nakukun ba naroman tanba Jezús moris iha kalan nakukun.

“Nakukun reprezenta hahalok sira-ne’ebé sabraut. Nia moris iha nakukun hodi lori naroman kasu no liberta ita hosi nakukun ida-ne’e. Bainhira Maroman haree naroman, nia dehan buat hotu furak no kapaas tán ne’e ita hotu nia moris. Ita lakohi hela iha nakukun laran. Ita buka no halo esforsu atu hadook-aan hosi nakukun ninian, tanba laiha ema ida mak hakarak moris iha nakukun laran,” Don Virgílio esplika.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here