Árvore Natál. Imajen/Espesiál

DILI, 24 dezembru 2020 (TATOLI)—Padre Pároku Motael, Guilhermino da Silva, hateten durante Natál la presiza luxu maibé presiza de’it maka loke laran simu Jesus kosok-oan iha fiar no karidade hodi tulun ema seluk.

“Maromak la presiza ita-nia luxu ba ninia prezensa, presiza de’it buat kiik-oan no simples tebes, loke odamatan fiar atu simu nia. Ha’u la hatene ita halo ona obra ida-ne’e iha momentu ne’e ka lae?, ita balun halo preparasaun sira liuhosi konfisaun, asaun karidade ruma durante adaventu hodi hatudu ita-nia solidaridade ba maluk sira ne’ebé kuran,” Padre Guilhermino tenik liuhosi ninia omília iha ámbitu Misa Natál, iha Igreja Motael, Farol, sesta ne’e.

Padre ne’e dehan, loron ba loron Nai-Maromak hakas-an nafatin  dere sarani sira-nia odamatan fuan atubele nia moris iha laran.

“Keta husik ita-nia laran sai fatin ne’ebé taka metin ba Maromak ne’ebé  atu mai moris ho ita, ita keta halo Nai moris iha fatin sira foer no la preparadu iha ita-nia laran, liuliu iha momentu ida-ne’e,” nia akresenta.

Amu Pároku ne’e konvida sarani sira atu halo reflesaun hodi haree ba an ida-idak.

“Ita keta laran to’os no taridu, ita keta hahi ho ita-nia moris ne’ebé nakonu ho preokupasaun no orgullu ho ita-nia moris ba interese rasik, maibé presiza loke odamatan atu Maromak tama no kompleta ita-nia moris tanba ho Ninia prezensa maka sei halo moris sai di’ak liután,” nia hatutan.

Amu Guilhermino nota katak momentu ne’e nasaun hotu enfrenta problema barak inklui Timor-Leste tanba prezensa COVID-19 ne’ebé halo ema hotu preokupa, tanba ne’e nia konvida atu hakbesik-an ba Maromak.

“Buat sira ne’e sei la mosu iha mundu, se ita ema iha mundu ne’e loke neon no laran atu simu Maromak iha ita-nia moris, tanba ne’e mai ita loke ita-nia neon no laran ba Maromak no sentidu husi liafuan murak sira ne’ebé atu soi ita-nia moris atu labele hetan susar,” nia fó hanoin.

Padre Pároku Motael ne’e husu ba sarani sira atu hadi’a no loke laran hodi simu Nai Maromak iha momentu Natál.

“Mai ita hadi’a ita-nia laran atu Nia bele hela no moris ho ita, basa Nia mai moris ho ita atu salva ita husi nakukun nia kbiit, Nia mai atu konvida ita tama mai iha haksolok nia laran,” Amu Guilhermino subliña.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here