Arsebispu ba Arkedioseze Metropolitana Dili, Don Virgílio do Carmo da Silva. Imajen Tatoli/Egas Cristovão.

DILI, 24 dezembru 2020 (TATOLI)—Arsebispu Arkedioseze Metropolitana Dili, Don Virgílio do Carmo da Silva, SDB, hateten liuhosi selebrasaun Natal kalan katak presiza halakon hahalok nakukun, dalan aat no injustisa iha sosiedade tanba ema hotu hakarak moris iha dame no esperansa ba futuru tanba dala barak ema mak sai obstákulu ba ksolok no dame.

Notisia Relevante: Selebra Natal tuir ambiente Jezús nia moris mak loos liu

“Dala barak ita mak sai obstákulu ba Maromak ninia konvite.Ita mak sai obstákulu ba ksolok no dame iha ita-nia família. Ita mak sai obstákulu ba ksolok iha ita-nia instituisaun ka ita-nia komunidade tanba dalabarak ita lakohi husik hahalok nakukun, dalan aat ninian, injustisa ninian,” Arsebispu Don Virgílio do Carmo da Silva, hateten iha nia omilia selebrasaun misa Natal iha Igreja Katedrál, Dili, kinta kalan.

Amu Bispu fó hanoin ba sarani hotu katak situasaun hirak ne’e mosu tanba ema sira-ne’ebé komete hahalok nakukun no kria injustisa fila kotuk ba Maromak.

“Tanba alabarak ita hanoin Maromak nia rekizitu sira lori ba susar. Ne’e mak halo ita hasoru situasaun sira-ne’e,” Amu bispu hateten.

Amu Bispu husu ema hotu atu haktuir profeta Isaias ne’ebé mosu hodi haklaken pás ba povu no haklaken kona-ba esperansa.

“Ita nasaun livre. Ita povu livre. Laiha nasaun ida mak ukun no hanehan ita. Ne’eduni, loloos ne’e, ita tenke sai ksolok no dame na’in,” Arsebispu Don Virgílio do Carmo da Silva hateten.

Amu Salesiano ne’e esplika, se selebrasaun Natal ida-ne’e mak la lori ksolok no dame entaun presiza halo ezame konsiénsia ida tanba Maromak laran di’ak, laran midar, la kole hodi buka ita maibé ema mak sai obstákulu boot.

“Dalabarak ema hotu hanoin nune’e, ‘ha’u hakarak moris tuir ha’u-nia isin nia hakarak’. Tan ne’e, ita-nia lójika no hanoin ho Maromak ninian dalabarak la hasoru malu. Ita ema nia hanoin naturál. Ita buka atu domina no buka atu ukun,” Arsebispu Don Virgílio do Carmo da Silva fó hanoin ba sarani sira

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here