Polisia Tránzitu sukat hela fatin asidente tráfegu ne’ebé rezulta aman ho oan mate iha área Kampu Alor, Dili,. Imajen/Dok.PNTL

DILI, 24 dezembru 2020 (TATOLI) – Durante inísiu janeiru to’o loron 24 dezembru, tinan ne’e, ema na’in-78 mak mate iha territóriu nasionál tanba asidente tráfegu.

Notísia Relevante : Labele sunu fogete durante misa Natál no kuidadu ba hariis tasi

Komandante Departamentu Tránzitu Seguransa Rodoviáriu Nasionál, Superintendente, João Belo dos Reis, liuhosi konferénsia imprensa, ohin, iha Komandu Jerál PNTL, Caicoli, Dili, informa vítima hirak ne’ebé mate maioria joven feto-mane ne’ebé lori motór ho marka Beat.

Tránzitu halo operasaun

Ofisiais Polísia Tránzitu hala’o hela identifikasaun ba asidente tráfegu iha area Palapasu, Dili. Imajen/Dok. Tatoli

Komandante João Belo dos Reis dehan, agora sira-nia parte hasai ona orden operasaun ba polísia tránzitu munisipiu hotu-hotu hodi halo operasaun auto-stop  kontrola movimentu transporte públiku no transporte privadu.

“Agora daudaun ami halo auto-stop iha territóriu Timor-Leste, no ba motorista sira labele lanu bainhira kondús karreta ka motór,”  Superintendente Polísia João Belo dos Reis afirma.

Ba komunidade sira ne’ebé uza transporte halo viajen ba munisipiu tenke lori dokumentu, karta kondusaun no viajen la’o neineik, tanba agora rai udan halo rai monu no estrada kotu no tahu maka’as.

Ba transporte públiku hanesan, angguna, bus, no mikrolete, Polísia husu atu labele tula pasajeiru liu karreta nia forsa. Tanba ne’e, João Belo dos Reis, afirma tan, bainhira iha auto-stop mak tula pasajeiru liu karreta nia forsa sei kona konsekuénsia ka tilang.

Ba karreta Estadu ne’ebé halo viajen, Komandante João Belo dos Reis, subliña tan, la iha dokumentu servisu  ka la iha orden servisu nian,  maka PNTL sei halo apreensaun no prosesa kazu tuir lei.

Notísia Relevante : Utilizadór viatura Estadu tenke destaka karreta Estadu iha servisu fatin

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here