Administradór Munisípiu Liquiçá, Domingos da Conceição dos Santos "Mau-Karo". Imajen TATOLI/Evaristo Soares Martins

DILI, 23 dezembru 2020 (TATOLI)—Administradór Munisípiu Liquiçá, Domingos da Conceição dos Santos “Mau-Karo”, lidera munisípiu refere durante tinan 10 ona tanba ne’e sei fó opurtunidade ba ema seluk atu lidera fali hodi nune’e povu bele avalia ritmu servisu.

Mau-Karo dehan, avizu ba prosesu rekrutamentu bazea ba méritu taka iha kuadru avizu hahú iha 10 dezembru 2020 remata iha 21 dezembru 2020 hodi lori kandidatu sira hatama aplikasaun.

“Kandidatu lubuk ida mak hatama aplikasaun maibé la inklui ha’u tanba kleur demais ona. Ema kole ona ho ita. Ita labele obriga-aan. Oportunidade tenke fó fali ba ema seluk hodi halo komparasaun iha ritmu servisu kabe ba atendimentu. Tanba, ita hakarak haree figura ida mais enérjiku, potensiál para hodi bele halo planu ida apropriadu hodi dezenvolve Munisípiu Liquiçá,” Mau-Karo informa ba jornalista sira, bainhira partisipa reuniaun alargada partidu CNRT nian, iha Novo Turizmu, kuarta ne’e.

Nia dehan, prosesu rekrutamentu ne’e tenke bazea ba méritu no tenke haree ba seriedade tanba iha Baucau nian mestradu ida kompete maibé ema ida ramata ensinu primária mak liu, ne’e la’ós selesaun bazea ba méritu.

“Ha’u-nia kinerja servisu mak durante tinan 10, ha’u hatudu tiha ona. Keta ema seluk di’akliu karik, entaun ita tenke fó opurtunidade hodi ita bele haree no avalia ba sira-nia servisu,” nia dehan. 

Nia parte laiha koñesimentu ba kandidatu sira tanba prosesu tomak kona-ba selesaun dokumentu hala’o hosi Ministériu Administrasaun Estatal (MAE).

“Kona-ba ezonerasaun, ha’u rezerva dezde 2017 kedas. Ha’u atu rejigna-aan ho razaun fó opurtunidade ba ema seluk maibé ha’u-nia mandatu loloos ne’e ramata iha abríl 2021, bazea ba estatutu administradór munisipál no prezidente autoridade sira nian. Se ezonera sedu mós ha’u tenke reklama direitu sira-ne’ebé mak iha. Kuandu prosesu rekrutamentu ne’e la bazea ba méritu mós ha’u la kontesta ona, fó ba seluk, lae ema dehan ha’u kantén podér. Ha’u ema negosiante nanis,” alin hosi saudozu Mau-Karo 305 ne’e hateten.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here