DILI, 23 dezembru 2020 (TATOLI)—Gabinete Espoza Prezidente Repúblika,Cidalia Nobre Mouzinho Guterres, tersa ne’e fahe prezente Natal ba labarik 120 maka daudaun ne’e hala’o hela internamentu iha sala Pediátria no Neonatolojia Ospitál Nasionál Guido Valadares (HNGV-sigla portugés) Dili.
“Kestaun tempu ita organiza simbolikamente fahe ba labarik sira nia fatin baixa,” Diretór Ezekutivu Ospitál Nasionál Guido Valadares Aniceto Cardoso Barreto, dehan ba jornalista sira iha HNGV ohin.
Sasán ne’ebé maka espoza PR nian distribui ohin ba labarik sira hanesan boneka, brinkedos, livru, lapizera no seluk tan.
Durante vizita, Cidalia Nobre mós halo vizita ba labarik sira ho problema má-nutrisaun ne’ebe oras ne’e halo hela internamentu iha Sala Pediátria.
Ezekutivu HNGV ne’e hateten, sala pediátria HNGV kada loron simu pasiente má-nutrisaun husi ema na’in 8 to’o 15.
”Tanba labarik sira baixa ba má-nutrisaun ne’e fulan-fulan 12% se ita hareeloron ida ema na’in 8 to’o 15 mak baixa ho kondisaun ne’ebé mak normál entaun sira ne’e la’ós Dili de’it maibé husi Munisípiu,” esplika Aniceto Cardoso Barreto.
Problema má-nutrisaun ne’e mosu tanba kontribui husi problema multisektorál maka hanesan fatór jenetik husi moris mai kedas, menus hahán, konsumu aihan la nutritivu sira no seluk tan.
“Agora komunidade balun ne’e aihan iha maibé laiha konesimentu ba hahan no fator seluk mak iha jestaun jenetika balun moris mai normál no balun ne’e moris mai ho má nutrisaun kedas ida ne’e afeta kresimentu fizika no ida seluk han hahan mak tarde tanba inan aman la iha konesimentu ba hahan nutritivu entaun ida ne’e mak fatór sira ne’ebé mak kontribui ba moras má-nutrisaun,”tenik tan.
Durante ne’e HNGV sempre hala’o edukasaun sivika ba inan-aman pasiente sira oinsá atu prepara hahán nutritivu ba oan sira.
Jornalista :Felicidade Ximenes
Editór:Agapito dos Santos
