Labarik sira faan asesoris Natal nian iha dalan públiku Portu Dili nia oin. Imajen TATOLI/Joanico de Araújo.

DILI, 23 dezembru 2020 (TATOLI)—Espoza Prezidente Repúblika, Cidália Nobre Lopes Mouzinho Guterres, hateten labarik sira ne’ebé kontinua hala’o atividade faan sasán iha dalan públiku ne’e responsabilidade hosi inan-aman nian tanba ne’e inan-aman sira mak dahuluk tenke tau matan no kuida labarik sira ho didiak.

Notísia Relevante: Gabinete Espoza PR fahe prezente natal ba labarik 120

Cidália Lopes Maouzinho Guterres, hatutan tama ba loron boot natal ne’e inan-aman no família sira mak tenke tau atensaun ba labarik sira loro-loron no labele hatodan fali labarik sira ho servisu hanesan faan sasán iha dalan públiku  maibé festeza natal hamutuk ho inan-aman sira iha uma.

“Oan ne’e, responsabilidade inan-aman nian. Inan-aman sira tenke tau matan no kuida ho didiak. Ita tama natal ona no ita-nia prezente boot mak ita selebra natal hamutuk ho família. Nune’e, kuida ita-nia oan sira hodi haksolok hamutuk, hodi festeza natal no tinan foun ida-ne’e hamutuk ho inan-aman sira iha uma. Ita iha esperansa foun ida hodi ita kontinua ita-nia vida ba oin,” Espoza PR, Cidália Nobre Lopes Mouzinho Guterres hateten bainhira vizita labarik moras sira iha sala pediatria iha Hospitál Nasionál Guido Valadares (HNGV), kuarta ne’e.

Inan ba nasaun ne’e afirma, inan-aman mak sai responsabilidade ba oan mak tenke hadook hosi sasan todan sira hanesan faan, maibé dala barak labarik sira mak hakarak faan tanba sira-nia kolega barak mak faan sasan entaun sira mós halo tuir de’it.

Labarik sira faan asesoris Natal nian iha dalan públiku Portu Dili nia oin. Imajen TATOLI/Joanico de Araújo.

“Ha’u hakarak hateten, labarik hira ona haruka fila ba sira-nia uma. Bainhira la’o kalan, ha’u hetan sira, ha’u husu no sira dehan ami mak hakarak tanba kolega sira barak mak faan. No, balun fali nesesidade mak obriga duni mak labarik sira tenke faan sasán. Maibé ida-ne’e, ha’u hanoin fila-fali ba inan-aman tanba ida-ne’e sira-nia responsabilidade,” Cidália hatete.

Nia hateten, dalaruma inan-aman balun dehan imi boot sira ko’alia maibé atu fó han no fó hemu ne’e foti hosi ne’ebé.

“Ha’u hakarak hatete katak oan ne’e responsabilidade inan-aman nian. Tanba ne’e, ita atu halo oinsá para asegura oan haree no kuida labarik sira. Hadook hosi situasaun ne’ebé ita la hakarak. Tanba violénsia hasoru labarik sira, dala balun deskuidu hosi inan-aman nian,” nia dehan.

Tanba, nia hateten, dala barak labarik sira inan-aman la hatene tuir sai ba ne’ebé, sai tuku hira, ba halo saida, no fila tuku hira. Buat hirak ne’e, akontese tanba oan ho inan-aman ida-idak la’o ninian, nune’e bainhira hetan dazastre ruma, hafoin parte hotu liliu inan-aman hakfodak no preokupa.

Notísia Relevante: Espoza PR-ofisiál PNTL no F-FDTL vizita labarik moras iha HNGV

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here