Vise-Diretór Asosiasaun HAK, Xisto dos Santos. Imajen TATOLI/Egas Cristovão.

DILI, 22 dezembru 2020 (TATOLI)—Vise-Diretór Asosiasaun HAK, Xisto dos Santos, hateten sosiedade sivíl sei kontra pagamentu ekstraordináriu ba klase elite no sei la husik situasaun ne’e akontese ba povu no rai ida-ne’e, relasiona ho pagamentu estraordináriu kona-ba saláriu adisionál fulan ida ba administrasaun públiku.

Notísia Relevante: FONGTIL kestiona saláriu adisionál fulan ida ba administrasaun públiku

“Ita sei la husik situasaun ida-ne’e kontinua eziste mak sei lori ita ba risku. Tanba loron ruma mina sei maran no osan sei laiha. Maibé agora ukun na’in sira tenta halibur rekursu Estadu nian hosi mina hodi kria ba sira-nia kondisaun rasik ne’ebé mak seguru. Maibé, sira husik povu moris iha marjinalidade nia-laran tanba kria pagamentu estraordinária kona-ba salariu adisionál,” Xisto dos Santos hatete iha salaun FONGTIL, Caicoli, Dili, tersa ne’e.

Tanba ne’e, nia hatutan, parte sosiedade sivíl hakarak kestiona sustentabilidade mákina Estadu nian, tanba sira hakarak aprova no promulga saláriu estraordináriu ne’e ba sira-nia aan nu’udar klase elite ne’ebé kada fulan simu salariu rihun $5 ba leten ne’e, maibé sira la hanoin povu ida-ne’ebé difísil atu hetan sentavus ida.

Nia dehan, se ida-ne’e mak akontese entaun Timor-Leste sei la atinje prinsípiu Objetivu Dezenvolvimentu Sustentável (ODS) katak to’o iha 2030 ne’e povu sei menus aimoruk, bee-moos, edukasaun no seluk tan.

“Ida-ne’e polítikamente, órgaun soberania komete abuzu poder. Ami mós sei keixa ba ukun-na’in sira ne’ebé la sériu atu liberta povu hosi ki’ak no mukit nia-laran, tanba ne’e ami sei alerta ba komité direitu umanu ONU nian. Ami sei alerta ba ne’ebá. Ami tenta atu alerta buat balun ne’ebé mak la halo kloot ita-nia objetivu atu oinsá kontrola desizaun polítika Estadu nian,” nia dehan.

Xisto dos Santos hateten, governante sira uza razaun atu oinsá sustentabiliza mákina Estadu tanba ne’e mak sosiedade sivíl sira asegura no rigorozu, nune’e iha poupansa boot ne’ebé la’ós de’it ba tinan lima maibé ba tinan 50 mai.

Tuir ia, afirmasaun sosiedade sivíl ba dekretu lei númeru 63/2020 kona-ba saláriu adisionál fulan ida ba administrasaun públika ne’e, iha razaun rua ne’ebé mak sosiedade sivíl hakarak foti. Sistematikamente órgaun soberanu uza podér polítika ne’ebé mak komete buat balun ne’ebé kria kondisaun entre ema riku no ema ki’ak, tanba buat ne’e akontese iha tempu ne’ebé Estadu iha polítika ida atu rekupera ekonómia nasionál.

“Rekupera ne’e ba sé. Ba povu baibain ka ba povu ida klase elite sira-ne’e mak hosi lei 63/2020 ne’e rasik. Tanba ne’e, ami preokupa ho situasaun ida-ne’e. Se bainhira ita husik mak ami haree tendénsia ba ema ne’ebé hanesan asesór sira no ema ne’ebé mak iha Maun Boot sira-nia kotuk ne’e, mak ho estratejikamente kria kondisaun ne’ebé mak hakarak soran povu ho líder sira,” Xisto afirma.

Antes tarde, nia hatete Provedoria Direitu Umanu no Justisa (PDHJ) iha lejítimu hodi halo fiskalizasaun molok natal.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here