Ministru Obra Públika, Salvador Eugênio Soares dos Reis Pires, hatudu hela dokumentu selebrasaun akordu estudu harii abitasaun foun. Imajen/Mídia MOP

DILI, 22 dezembru 2020 (TATOLI)Ministériu Obra Públika (MOP) selebra ona akordu ida ho Ministériu Finansa (MF) hodi realiza estudu harii uma iha suku Comoro no Hera, munisípiu Dili, ne’ebé hanesan parte ida husi programa revitalizasaun no abitasaun komunitária.

Akordu ne’e asina hosi Ministru Obra Públika, Salvador Eugênio Soares dos Reis Pires no Ministru Finansa, Rui Augostu Gomes.

Tuir nota imprensa ne’ebé Agência TATOLI asesu, akordu ne’e fó biban ba International Finance Corporation (IFC) hahú halo ona estudu harii uma ka habitasaun foun hamutuk unidade 2.000 iha área Halidolar, Hera no iha eis Merkadu Comoro ne’ebé identifikadu ona husi Teras no Propriedade.

Notísia Relevante: CAFI aprova programa revitalizasaun no abitasaun konstrui uma unidade 2.000

Realizasaun paktu ne’e tanba orsamentu ba estudu harii uma unidade 2.000 aprova ona iha reuniaun Konsellu Administrasaun Fundu Infraestrutura (CAFI, sigla portugés), ne’ebé aprezenta husi Vise-Ministru Obra Públika, Nicolau Lino Freitas Belo, iha reuniaun konsellu ne’e foin lalais.

“Estudu harii habitasaun foun iha Hera no Comoro husi IFC sei hala’o durante fulan 18, ho orsamentu hamutuk $550.000 resin,” refere nota imprensa ne’e.

Planu no polítika VIII Governu Konstitusionál iha área abitasaun no urbanizmu maka atu organiza di’ak liután kapitál Dili, nune’e Governu sei harii uma ba komunidade ho organizadu, sentralizadu no bainhira Governu hakarak muda abitante sira husi fatin ida ba fatin seluk, bele lokaliza komunidade iha abitasaun foun ne’ebé harii ona husi Governu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here