Sidadaun xinés sira ne’ebé to’o iha aeroportu Dili ho vou AirAsia.

DILI, 22 dezembru 2020 (TATOLI)–Ministériu Saúde deside hodi kansela pedidu autokuarentena ba ema besik na’in-50 ho vou AirAsia ho totál pasajeiru hamutuk 121 ne’ebé to’o ohin iha Aeroportu Internasionál Nicolau Lobato Díli.

“Ami simu relatóriu ofisiál ida husi ajénsia Air Timor bainhira halo checking iha Kuala Lumpur, ita-nian pasajeiru sira ne’ebé maka atu halo viajen mai ita-nian rai hamutuk 123 ne’e iha na’in-rua mak parte ajénsia la aseita tama aviaun tanba ida kuandu teste iha Malázia pozitivu COVID-19 ho nia sertifikadu no ida sein iha sertifikadu COVID-19. Tanba ne’e mak ajénsia foti desizaun kansela kedan iha Kuala Lumpur,” Diretór Interinu ba Asuntu Konsulár no Protokolár Ministériu Negósiu Estranjeiru no Kooperasaun (MNEK), João da Costa Braz informa.

Tuir Diretór João Braz, timoroan na’in-rua ne’e halo viajen husi Reinu Unidu mai Kuala Lumpur, Malázia. Entretantu, autoridade Malázia kansela sira-nian viajen no husi parte Embaixada Timor-Leste iha rai refere toma ona atensaun ba sidaudaun na’in-rua ne’e.

Timoroan sira ne’ebé mai ho vou AirAsia prepara atu bá otél ne’ebé mak Governu prepara.

Nune’e ajénsia alerta kedan karta mai parte MNEK liuhusi Diresaun Jerál ba Asuntu Konsulár no Protokolár hodi hato’o imediata ba Ministériu Saúde (MS) hodi bele halo atuasaun ida urjente.

“Husi parte Ministériu Saúde hato’o karta ofisiál ida katak pasajeiru 121 la bá diretamente iha otél, maibé konsentra iha fatin ida de’it. Aviaun ohin tun ona iha Aeroportu Internasionál Nicolau Lobato ho totál pasajeiru 121. Iha mós pedidu ba autokuarentena husi ema liu 50.  Sira ne’e hotu sei labá autokuarentena tanba ne’e orden ofisiál husi Ministériu Saúde. Situasaun ida ne’e mak halo pasajeiru hotu konsentra iha fatin Governu prepara, hodi nune’e bele iha kontrolu husi parte saúde nian,” nia dehan.

Diretora Nasionál Kontrola Moras, Josefina Clarinha João, hatete husi parte MS hetan inforasaun katak vou ida-ne’ebé timoroan no estranjeiru sa’e ne’e deteta kazu pozitivu ida, nune’e ministériu deside sira-ne’ebé husu ona autorizasaun ba autokuarentena ne’e kansela hotu.

“Ami deside hodi tau sira iha fatin ne’ebé maka Governu prepara hodi nune’e fásil mai ita atu kontrola durante loron 14 iha kuarentena,” nia hateten.

Responsável ne’e informa mós konfinamentu obrigatóriu ne’ebé Exekutivu deside ona mak Otél Time Square, Vila-Verde, Y.Q Airport Hotel, Fortuna no Regal Apartment.

MS sei halo kontolu ida rigor ba pasajeiru sira ne’e hodi halo monitorizasaun ida besik liu hodi hatene sira-nian kondisaun.

Nune’e mós Xefe Ekipa Covid-19 husi Polísia Nasionál Timor-Leste (PNTL), Marcos Sequeira Nunes, afirma katak kona-ba pasajeiru 121 ne’e husi parte seguransa sei tau atensaun másima durante kumpri kuarentena.

“Ami tenke tau seguransa estra para labele iha família sira vizita, nein sira simu buat ruma husi laran [iha fatin kuarentena] fó sai ba li’ur,” nia dehan.

Vou AirAsia ne’ebé ohin tula timoroan no estranjeriu mai ne’e lori fila pasajeiru 123 husi Timor-Leste bá Kuala Lumpur.

Jornalista: Maria Auxiliadora

Editór: Cancio Ximenes

HAKEREK NO HATÁN

Please enter your comment!
Please enter your name here