MInistru Edukasaun Juventude no Desportu, Armindo Maia. Imajen Tatoli/Egas Cristovão

DILI, 22 dezembru 2020 (TATOLI)—Ministru Edukasaun Juventude no Desportu (MEJD), Armindo Maia, triste ho rezultadu ezame nasionál tanba ensinu públiku la tama iha kategoria eskola ho valór aas.

“Ha’u kontente tanba iha eskola lubuk ida iha territóriu Timor-Leste ne’e konsege eduka no forma alunu sira hodi hetan notas ou rezultadu di’ak, maibé parte ida ha’u hanesan Ministru Edukasaun triste tanba eskola públiku ida mós la tama iha estudante mellores,” nia hateten ba dirijente no estudante sira bainhira inaugura Kampo Futsál no Salaun ESJ 10 de Dezembru Comoro, tersa ne’e.

Notísia Relevante :Eskola 10 hetan valór aas iha Ezame Nasionál

Governante ne’e dehan Governu durante ne’e halo esforsu hodi investe iha eskola públiku sira maibé rezultadu ezame seidauk kompetetivu ho eskola privada sira.

“Ha’u nia kompromisu sei la promote atu hadi’a eskola públiku hotu iha Munisípiu sira tanba falta de’it tinan rua, maibé ha’u tau matan ba eskola públiku balun iha Munisípiu sira atu nune’e bele hasa’e ninia kualidade intermus prosesu ensinu aprendizajen,” katak nia.

Tuir planu iha tinan 2021, MEJD sei halo estudu viabilidade ba eskola públiku sira atu oinsá investe osan no rekursu umanu hodi garante kualidade edukasaun ba estudante sira.

Entretantu, estudante finalista husi eskola privada no públiku hamutuk 10 maka hetan valór aas durante ezame nasionál tinan letivu 2020.

Ensinu báziku nian maka estudante Fátima Tacia Soares Vicente husi Eskola Sentru Aprendizajen no Formasaun Eskolár (CAFE-sigla portugés) Maliana maka hetan valór excelente 46.

Hosi ensinu sekundária jerál siénsia no teknolojia nian iha estudante na’in 10 mak aprovadu ho valór 46 maihusi Eskola Sekundária Jerál Santa Madalena de Canossa 1, Ensinu Sekundáriu Jerál  Paulo VI na’in 2, Ensinu Sekundária Jerál Santo Inácio de Loyola na’in 2, Ensinu Sekundáriu Jerál São João Bosco na’in 1, Externato de São José na’in 1, Ensinu Seskundária Jerál  São Pedro na’in 1, Ensinu Sekundáriu Jerál  Santo António Baucau na’in 1, Ensinu Sekundáriu Jerál Nicolão Lobato na’in 1.

Nune’e mós husi Ensinu Sekundária Jeral Siénsia Sosiais nian, iha estudante na’in 1 ho naran Denivia T.G.N Perreira husi Ensinu Sekundáriu Jerál  Santo Inácio de Loyola sai estudante diakliu tanba aprovadu ho valor 52.

Iha 2020, estudante finalista hamutuk 53.425 ho pursentu 97 maka aprovadu, no 1.647 ka pursentu 3 reprovadu hafoin partisipa ezame nasionál (EN) iha loron 16 to’o 18 fulan-novembru 2020.

Estudante ensinu báziku hamutuk 30.359, sira ne’ebé maka pasa 29.437 ho pursentu 96.96(%), reprovadu 922 ho pursentu 3.03(%), Ensinu Sekundáriu Jerál ho totál estudante finalista hamutuk 20.145, aprovadu 19.671 (97.65 %), reprovadu ema na’in 474 (2.35%).

Nune’e mós, ensinu tékniku vokasionál iha totál estudante finalista 4.568, aprovadu 4.317 ho pursentu (94.50) no reprovadu ka pursentu (5.50%).

Notísia Relevante :Estudante rihun 53-resin pasa EN, 1.647 reprovadu

Jornalista: Tomé Amado

Editór: Agapito dos Santos

1 KOMENTÁRIU

  1. SE Ministro keta triste tamba valor nbe Estudante husi eskola pribadu sira. Eskola publiku merese la hetan duni valor diak tamba Lei Edukasaun taka dalan ba profesor sira atu eduka Estudante ho diak. Tamba iha eskola profesor sira lable obriga estudante atu aprende ho diak, wainhira profesor sira obriga estudante estuda nee kontra Lei. Tamba nee SE Ministro persisa hare didiak lei nee hodi hadia. Se lae maka Timor oan sei sai pior liu iha futuro.

HAKEREK NO HATÁN

Please enter your comment!
Please enter your name here