Jornalista no universitáriu sira tuur rona hela esplikasaun hosi oradór/a sira iha semináriu nasional ho tema “Jornalizmu entre Dezafoi no Oportunidade” ne’ebé AJTL realiza iha salaun konefer’ensia Antigu komarka, Balide, Dili. Imajen/Facebook: Racom Maubisse Mauloko.

DILI, 22 dezembru 2020 (TATOLI)—Asosiasaun Jornalista Timor-Leste (AJTL), ohin, selebra aniversáriu AJTL ba dala-21 hodi realiza semináriu nasional ho tema “Jornalizmu Entre Dezafiu no Oportunidade” iha salaun konferénsia Centro Nacional Chega (CNC) iha Antigu Komarka, Balide, Dili, tanba iha impase polítika no pandemia COVID-19 ne’e jornalista sira enfrenta dezafiu barak iha terrenu.

“Ami hili tema “Jornalizmu Entre Dezafiu no Oportunidade” ne’e, tanba ita haree katak situasaun agora hanesan pandemia COVID-19 ne’e fó impaktu ba jornalista sira tanba instituisaun deside tenke ko’a sira-nia saláriu tanba ho razaun katak labele hetan rendimentu di’ak no impase polítika iha rai-laran,”Prezidente AJTL, Zevonia Vieira, hateten ba jornalista sira, tersa ne’e.

Zevonia Vieira hateten, maske jornalista sira esforsu hodi halo kobertura iha situasaun pandemia COVID-19 maibé jornalista balun tenke sai vítima tanba instituisaun mídia balun laiha rendimentu entaun tenke ko’a jornalista sira-nia saláriu.

Dezafiu seluk, nia dehan, mak iha impase polítika ne’e kria distánsia entre jornalista ho polítika na’in sira dook malu entaun ida-ne’e hamosu konflitu ne’ebé liga ho kobertura jornalista nian ne’ebé la tuir polítika na’in sira-nia hakarak.

“Ha’u hanoin dezafiu boot tanba sai hanesan obstakulu ba ita-nia jornalista sira. Tanba ne’e, AJTL esforsu atu fó abilidade liuhosi formasaun no diskusaun liuhosi órgaun kompetente hanesan membru Governu no membru Parlamentu Nasionál sira. Ita kontinua halo mídia literasia atu ema hotu respeita servisu mídia nian iha terrenu no labele viola jornalista sira bainhira sira hala’o nia knaar iha fatin públiku,” nia dehan.

Kona-ba oportunidade, nia hateten, AJTL halo ona diskusaun lubuk ida ho instituisaun relevante sira no hala’o mídia tour mós la’o ona iha fulan kotuk liubá, kona-ba agrikultór nian iha área rurál.

“Ita sei iha oportunidade atu hala’o tan maibé depende ba planu ne’ebé estrutura halo ona katak iha tinan oin ita kontinua fó prioridade liu ba formasaun, editór club, no mós atividade mídia tour ne’ebé sei involve membru sira. Maibé la’ós de’it ba membru AJTL maibé ita mós sei fó oportunidade ba estudante komunikasun sosiál sira atu oinsá kapasita sira-nia aan antes sai jornalista,” nia hateten.

Prezidente AJTL ne’e haktuir, iha tinan 2021 ne’e AJTL kontinua halo aprosimasaun ho Governu atu Governu labele kriminaliza difamasasaun no AJTL mós sei fó prioridade ba sensível jéneru iha mídia sira hotu.

“Ami-nia prioridade boot liu mak kontinua promove kobertura ne’ebé sensível ba jéneru, hahú hosi sala redasaun, editór no oinsá foti desizaun iha knaar jornalista nian no promove jornalista ne’ebé boa paz iha ita-nia sosiedade,” nia dehan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here