Linguista independente, João Sarmento, hateten bainhira sai oradór iha semináriu nasional ho tema “Jornalizmu entre Deazfiu no Oportunidade” ne’ebé Asosiasaun Jornalista Timor Lorosa’e (AJTL) realiza. Imajen/Media CI.

DILI, 22 dezembru 2020 (TATOLI)—Linguista Independente, João Sarmento, rekomenda ba instituisaun mídia sira liuliu jornalista sira ne’ebé loro-loron hakerek tenke uza ortografia padronizada tetun Institutu Nasionál Linguístika (INL) iha produsaun notísia ba públiku.

Notísia Relevante: Instituisaun mídia presiza investe ekipamentu teknolójia

“Ha’u sujere no rekomenda ba instituisaun mídia atu uza ortografia padronizada tetun INL iha produsaun notísia nian ba ita-nia públiku,” Linguista independente, João Sarmento, hateten bainhira sai oradór iha semináriu nasional ho tema “Jornalizmu entre Deazfiu no Oportunidade” ne’ebé Asosiasaun Jornalista Timor Lorosa’e (AJTL) realiza hodi selebra aniversáriu AJTL ba dala-21, iha Salaun Konferénsia Centro Nacional Chega, Antigu Komarka, Balide, Dili, ohin.

João Sarmento esplika, tuir dekretu Governu númeru 1/2014 ne’ebé ko’alia kona-ba ortografia padronizada INL nian, língua tetun importante tebes iha prosesu konstrusaun Estadu no nasaun nian. Tanba ne’e, instituisaun Estadu hotu-hotu inklui meu komunisaun sosiál sira tenke uza padraun tetun INL ne’ebé sai hanesan lian ofisiál iha Timor-Leste.

“Ita-nia dekretu Governu ne’e Governu mak harii. Entaun, ita hanesan sidadaun ida tenke hala’o tuir saida mak eziste iha Timor-Leste. Ida-ne’e Guvernu mak haruka tanba ne’e atu di’ak liu instituisaun mídia no instituisaun Estadu presiza uza INL ba atividade ida-idak nian,” nia dehan.

Nia hatitan, iha Konstituisaun artigu 3 hatete katak língua tetun hanesan língua ofisiál ba nasaun Timor-Leste nian, nune’e di’ak liu la’o tuir dekretu ne’e hodi uza INL maske sei iha dezafiu.

“Maibé durante ne’e, ha’u akompañia notísia mídia barak mak uza INL ba produsaun notísia. Hanesan mídia online TATOLI ne’ebé mak mídia Estadu, ha’u haree sempre uza INL. Kona-ba mídia imprime mak Timor Post,” nia hateten.

João Sarmento hatete mídia balun mós komesa uza INL ona maibé seidauk iha konsisténsia. STL News, nia hateten, sira uza língua tetun versaun Dili Institut of Thecnology (DIT) nian, maibé nia mídia sira iha Timor-Leste maiória mak uza ona tetun padraun INL.

Jornalista: Osória Marques

Editór: Cancio Ximenes

1 KOMENTÁRIU

HAKEREK NO HATÁN

Please enter your comment!
Please enter your name here