Oradora Dulce Martins da Silva (tuur iha liman-kuana) lori tema "Merkadu Mídia iha Era Dijitál" iha semináriu nasional ne’ebé AJTL realiza. Imajen/Facebook: Racom Maubisse Mauloko.

DILI, 22 dezembru 2020 (TATOLI)—Dosente Komunikasaun Sosiál iha Universidade Nasionál Timor Lorosa’e (UNTL), Dulce Martins da Silva, hateten instituisaun mídia sira tenke investe barak liu ba ekipamentu teknolójia sira hanesan telefone ne’ebé avansadu ba nia jornalista no halo investimentu ba rekursu umanu nian iha mídia.

Notísia Relevante: Jornalizmu entre dezafiu no oportunidade

“Mídia sira presiza investe ekipamentu teknolójia ne’ebé avansadu ba jornalista sira, nune’e jornalista bele hala’o nia knaar ho di’ak hodi fó sai informasaun ne’ebé kualidade ba komunidade sira,” Dulce Martins da Silva hateten ba jornalista sira, iha salaun konferénsia Centro Nacional Chega (CNC), Antigu Komarka, Balide, Dili, tersa ne’e.

Nia hatutan, jornalista sira tenke matenek no kreativu iha simplisidade, mezmu ekipamentu ne’ebé seidauk modernizadu maib’e ba oin mídia sira toma atensaun ba dezenvolvimentu ba rekursu umanu no ekipamentu modernizasaun.

Nia hateten, maske Timor-Leste enfrenta pandemia COVID-19 maibé jornalista sira sempre fó sai informasaun ho lalais.

“Ita-nia jornalista sira fó informasaun lais tebes, maske pandemia COVID-19 nia-laran. No, tanba ita iha ona telefone ANDROID, ne’ebé ha’u hanoin informasaun hotu sei transmite lalais ba iha públiku sira. Maibé ita nafatin rekoñese katak instituisaun mídia sira nafatin presiza merkadu. Entaun, signifika mídia presiza osan hodi halo produsaun no investe promosaun ruma hodi iha lukru ba instituisaun ne’e nian, nune’e atividade bele la’o,” nia dehan.

Iha aniversáriu Asosiasaun Jornalista Timor-Leste (AJTL) ba dala-21 ne’e, oradora Dulce Martins da Silva aprezenta tema “Merkadu Mídia iha Era Dijitál”, tanba ne’e mak nia husu ba mídia na’in sira atu investe ekipamentu teknolójia iha mídia sira.

“Iha ha’u-nia aprezenta ohin, oinsá kompetisaun mídia sira, liliu iha era dizitalizasaun ne’e. Iha ne’e ita ko’alia kona-ba mídia televizau, rádiu, mídia online no imprime,” nia dehan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here