Diretór Ezekutivu FONGTIL, Daniel Santos do Carmo (klaran) Hamutuk Ekipa Fongtil halo konferénsia impresa Kona-ba Pagamentu Extraordiariu salariu adisional fulan ida nian ba administrasaun publika. iha Fongtil Caicoli, tersa (22/12). Imajen Tatoli/Egas Cristovão

DILI, 22 dezembru 2020 (TATOLI)—Forum Organizasaun Naun Governamentál Timor-Leste (FONGTIL) hanesan organizasaun sumbriña ba organizasaun sosiedade sivíl sira kestiona makaas kona-ba saláriu adisionál fulan ida ba administrasaun públiku tanba ida-ne’e konsidera hanesan krime.

Diretór Ezekutivu FONGTIL, Daniel Santos do Carmo, hateten FONGTIL mós kontra dekretu-lei númeru 63/2020, 10 dezembru, hodi husu ba Estadu no Governu atu tau importánsia ba povu nia nesesidade, ba nasun nia futuru duké hanoin interese privadu mak aas liu.

“Ita kestiona saláriu adisionál fulan ida ba administrasaun públiku tanba ita konsidera hanesan krime tanba la fó benefisíu ba povu maibé fó benefisíu liu ba ema boot sira,” Diretór Ezekutivu FONGTIL, Daniel Santos do Carmo, hateten iha salaun FONGTIL, Caicoli, Dili, tersa ne’e.

Diretór Ezekutivu ne’e haktuir, dekretu lei númeru 63/2020 kona-ba pagamentu ekstraordináriu adisionál fulan ida ba administrasaun públiku ne’ebé Konsellu Ministru aprova no promulga hosi Prezidente Repúblika iha loron 10 dezembru 2020 ne’e fó benefisíu de’it ba sira-ne’ebé mak ho saláriu fulan ida hetan liu $5.000.

Diretór Ezekutivu FONGTIL, Daniel Santos do Carmo. Imajen Tatoli/Egas Cristovão

“Signifika katak iha fulan dezembru ne’e entidade hotu-hotu ne’ebe servisu iha administrasaun públika sei simu tan saláriu fulan ida-nian ka dobru saláriu hahú hosi saláriu $5.000 mai kraik. Nune’e sira mak sai benefisíariu di’ak hosi dekretu-lei númeru 63/2020 mak hanesan Prezidente Repúblika, Prezidente Parlamentu Nasionál, Vise Prezidente no membru Parlamentu Nasional, Primeiru Ministru no Membru Governu sira, Prezidente Tribunál Rekursu, Prokurador Jerál, Provedoria Direitu Umanu no Justisa, Komisáriu CAC, Eis-titulár no eis-membru sira hosi órgaun soberania no funsionáriu sira hotu (permanente no kontratadu) no nomeasaun politika sira,” nia esplika.

Sosiedade Sivíl, nia dehan, la kestiona funsionáriu baibain tanba sira-nia saláriu natón maibé kestiona mak ema-boot sira. Nia dehan, dekretu lei ida-ne’e hatudu momoos katak ukun-na’in sira sempre uza oportunidade hodi atribui sira-nia susesu ho estratejia no abilidade ho nune’e totalmente evita realidade katak sira tama iha jogu privileijiu nian.

Tanba, nia hateten, politíku na’in sira-nia tendénsia hodi rasionaliza tiha benefisíu ba sira nia-aan no fiar katak sira merese duni atu hetan. Maske nune’e, sira hatudu momoos katak ne’e abuzu ba poder no privileiju ba sira buka hodi tau sira-nia interese própriu no moraliza ba ganansia fasilmente.

Nia hateten, ukun-na’in sira esperimenta to’ok hanesan sira hetan pagamentu estraordináriu saláriu adisionál fulan ida nian ho saláriu $5.000 mai kraik kompara ho povu ki’ak ne’ebé simu de’it Cesta Bázika ho kustu $25 ba kada ema ida iha momentu ne’ebé povu barak hasoru susar iha sira-nia moris tanba impase polítika no pandemia COVID-19.

Diretór ne’e afirma, polítika ida-ne’e hamosu dezigualdade ne’ebé afeta negativamente estabilidade sosiál no polítika inklui difikulta ba kresimentu tantu ba reseita no gastu Governu nian. Tanba, pagamentu estraordináriu ne’e sei fó satisfasaun ba Instituisaun Estadu Timor-Leste nian maibé laiha efeitu pozitivu ba povu ki’ak sira-nia moris.

“Tuir ami Organizasaun Sosiedade Sivíl nia observasaun durante ne’e, katak Dekretu-Lei ida-ne’e kontrariu ho polítika poupansa, hamosu injustisa, no insulta boot ba povu lubun boot iha rai ida-ne’e. Tuir ami-nia kalkulasaun, pagamentu estraordináriu ne’e sei gasta osan hamutuk millaun $25,” nia dehan.

Ho kestaun hirak ne’e, nia dehan, tanbasá osan ho montante boot ne’e ukun-na’in sira uza ho prudente hodi investe ba setór produtivu sira hanesan agrikultura, turizmu, edukasaun no saúde ka sosa “ró hanesan rói Berlin-Nakroma” hodi fasilita transporte ba sidadaun sira hosi Dili ba Oé-Cusse no Atauru.

Ba asubtu ida-ne’e, nia hatuir, Governu no Prezidente Republika hatudu momoos pratika abuzu ba poder no privilejiu hodi hamosu diskriminasaun ba povu sira bazea ba Dekretu-Lei Nú. 63/2020 ne’ebé hamosu injustisa iha sosiedade ida-ne’e. Tanba ne’e, FONGTIL husu ba Prezidente Republika, Primeiru-Ministru atu deklara tanbasá tenke fó saláriu adisionál ne’e.

“Ami husu ba Primeiru-Ministru atu elimina tiha dekretu-lei Nú. 63/2020, 10 de dezembru ne’e.  Husu ba Comissão Antí Corrupção (CAC) atu halo intervensaun hodi loke prosesu hasoru governante sira tanba ami haree katak governante sira prátika abuzu poder liuhusi halo lei hodi benefisía sira no ida-ne’e FONGTIL konsidera hanesan krime,” Daniel akresenta.

FONGTIL husu ba PDHJ atu uza nia kompeténsia hodi husu ba Tribunál Rekursu hodi halo fiskalizasaun abstrata ba dekretu-lei Nú. 63/2020 ne’e, tanba dekretu refere viola konstituisaun RDTL artigu 145 alinea 2-3.

Nia husu mós ba Parlamentu Nasionál nu’udar fatin ba reprezentante povu atu uza nia kompeténsia hodi husu ba Tribunál rekursu atu halo fiskalizasaun abstrata ba dekretu lei ida-ne’e tanba viola konstituisaun RDTL artigu 145 alinea 2-3.

“Ami hein katak Maun Boot sira hanesanTaur Matan Ruak, Francisco Guterres Lú Olo, Xanana Gusmao, José Manuel Ramos Horta, Mari Alkatiri, sei la kontra sira-nia konsiénsia hodi simu osan ida-ne’e no sira sei hamutuk ho FONGTIL hodi elemina tiha dekretu-lei refere,” nia esplika.

Jornalista: Osória Marques

Editór: Cancio Ximenes

2 KOMENTÁRIU

  1. Ita boot sedauk hatene karik katak lei nee aprova tiha ona iha konselho ministro , ita boot sira foin kestiona nee ,,, hanoin tarde ona karik.

  2. O kestiona mk sira nebe manan 1000$ ba leten ne karik justu,,,brow!!! maioria FP sira manan ne 500$ mai karaik…..bele mos brow ida diretor FONGTIL ne manan osan liu fali cleaner sira. FP sira nia familia mos kategoria povo timor leste toh???

HAKEREK NO HATÁN

Please enter your comment!
Please enter your name here