Fakuldade Siénsia Sosiál (FCS, sigla portugés), Universidade Nacional Timor Lorosa´e (UNTL) hahú diskute hodi halo revizaun ba kurríkulu fakuldade nian (European Credit Transpher System-ECTS). Imajen/Media UNTL.

DILI, 22 dezembru 2020 (TATOLI)—Fakuldade Siénsia Sosiál (FCS, sigla portugés), Universidade Nacional Timor Lorosa´e (UNTL) hahú diskute hodi halo revizaun ba kurríkulu fakuldade nian (European Credit Transpher System-ECTS), iha Polo universidade Munisípiu Aileu.

Intensaun ba revizaun kurríkulu ne´e hodi hatán ba dinámika siénsia no merkadu traballu nian iha Timor-Leste no globál liuhusi formasaun profisionál iha área konsentrada sira.

Dekanu FCS, Camilo Ximenes, iha abertura hateten, diskusaun ba revizaun kurríkulu ne´e, parte ida, atu responde mós rekomendasaun ANAAA (Ajénsia Nasionál ba Avaliasaun no Akreditasaun Akadémika, sigla portugés) no hamosu paradigma foun.

“Revizaun bazea mós ba rekomendasaun husi ANAAA tanba kurríkulu ECTS implementa ona hafoin tinan lima hodi ajusta tuir situasaun atuál no globalizasaun nian no hatán ba kampu serbisu nian liuliu disiplina ne´ebé la nesesáriu ajusta tuir departamentu idaidak,” refere komunikadu mídia UNTL ba Agência TATOLI, ohin.

Enkuantu, Pró-reitór ba Asuntu Akadémiku, Profesór Miguel Maia dos Santos agradese ba estrutura FCS tan hahú prosesu revizaun kurríkulu atu refleta situasaun ne´ebé ultrapasa ona hodi adota ho situasaun ida ohin loron nian.

“Mudansa kurríkulu ne´e ita halo tanba ita presiza mudansa no mudansa ne´e bele dirije universidade bele hakbesik ba Sentru Exelénsia tanba ne´e ita haree UNTL eziste, banati tuir prinsípiu ensinu, peskiza no dedikasaun ba komunidade; pontu tolu ne´e adota tuir ensinu nian hodi garante kualidade ensinu ba universitáriu ne´e,” akadémiku ne´e tenik.

Pró-reitór ne´e salienta tan katak UNTL iha fakuldade define espesífika husi planu estratéjiku, Sentru Eselénsia ho lema Sapienta et Verritas ka Siénsia no Verdade, husi pontu hirak ne´e hakonu ho koñesimentu, étika, abilidade no sólidu iha ekipa.

“Iha kurríkulu ita presiza hatuur iha indikadór ne´ebé bele vizaun estratéjika tanba relasiona ho saida mak hanorin, oinsá atu hanorin, língua saida mak atu hanorin,” Akadémiku ne´e dehan.

Nune´e mós, Pró-reitór ba Garantia Kualidade, Marcos António Amaral agradese ba FCS tanba bele konvida hodi partilla hanoin ruma liga ho ECTS dezde implementa iha 2014, liu ona tinan lima presiza revizaun.

“Ha´u hanoin importante ita bele hasoru malu iha revizaun kurríkulu atu fasilita estudante sira ho di´ak atu tama iha kampu serbisu bazea ba rekomendasaun husi ANAAA nian, iha indikadór aprendizajen hodi fó énfaze ba silabus atu fasilita di´ak liu estudante sira,” manorin-na´in ne´e konsidera.

Entretantu, iha revizaun ne´e hanesan inísiu no faze tuirmai mak departamentu idaidak halo redasaun bazea ba rekomendasaun sira antes entrega esbosu ba fakuldade. Iha Fakuldade CS iha departamentu hanesan Administrasaun Públika, Dezenvolvimentu Komunitáriu, Polítika Públika, Komunikasaun Sosiál, Relasaun Internasionál no mós Siénsia Governamentál.

Partisipa iha atividade revizaun ne´e mak Pró-Reitór ba Asuntu Akadémiku, Profesór Miguel Maia dos Santos, Pró-reitór ba Garantia Kualidade, Marcos António Amaral, Eis-reitór UNTL, Aurélio Guterres, Dekanu FCS, Camilo Ximenes Almeida ho estrutura, diretór departamentu no dosente sira, inklui funsionáriu no konvidadu sira.

Jornalista: Rafy Belo

Editór: Cancio Ximenes

HAKEREK NO HATÁN

Please enter your comment!
Please enter your name here