Embaixada Estadu Unidu Amérika (EUA) iha Timor-Leste (TL) entrega sertifikadu ba jornalista timoroan na´in-neen nu´udar primeiru graduadu ba Programa Bolsa Estudu Marie Colvin Memorial iha LELI (Lorosa´e English Language Institute). Imajen/Mídia EUA.

DILI, 22 dezembru 2020 (TATOLI)—Embaixada Estadu Unidu Amérika (EUA) iha Timor-Leste (TL) entrega sertifikadu ba jornalista timoroan na´in-neen nu’udar primeiru graduadu ba Programa Bolsa Estudu Marie Colvin Memorial, hafoin tinan ida tuir formasaun intensiva lian inglés iha LELI (Lorosa´e English Language Institute).

Jornalista sira ne´e mak hanesan Zezito da Silva husi TATOLI,I.P-Agência Noticiosa de Timor-Leste, Constancio Vieira husi RTTL,EP), Olga da Silva husi Timor Post, Imaculada Ximenes husi Dili Post, Gaudêncio Figueredo husi Independente no mós Vanesa da Cunha Alves husi Grupu Media Nasionál TV (GMNTV).

“Agradese ba embaixada Amérika,” Jornalista Zezito da Silva agredese hodi kompromete atu prátika nafatin koñesimentu ne´ebé iha ona, perante jornalista sira hafoin simu sertifikadu, iha Restaurante Qulina Gourmet, Avenidade de Portugal, Praia dos Coqueiros, Dili, ohin.

Iha biban hanesan, ho susesu ne´e, Alumni Departamentu Komunikasaun Sosiál, Universidade Nacional Timor Lorosa´e (UNTL) ne´e enkoraja foin sa´e sira atu badinas aprende no estuda barak liuhusi lee barak no rona barak hodi koñese mundu.

Nune´e mós hato´o mensajen ba foinsa´e sira, feto eh mane katak nu´udar joven tenke tau aan hanesan joven ba futuru nasaun nian.

“Ita presiza aprende buat barak tanba nasaun presiza ita-nia kontribuisaun tomak, iha ita-nia jornada moris tomak,” nia motiva.

Enkuantu, Enkarregadu Negósiu Embaixada EUA, Elias Parra espera katak ho abilidade linguístika ne´ebé jornalista sira ne´e hetan iha língua ingleza, bele ajuda verifika faktu sira, buka fonte notísia foun no halibur informasaun oioin atu jornalista sira-nia reportajen kompriensivu liután.

“Ami mós espera, imi hetan inspirasaun husi Marie Colvin nia aten-brani no profesionalizmu no imi sei uza imi-nia abilidade lian inglés atu fó sai lia-loos atu haforsa no harii imi-ni demokrasia,” nia dehan.

Enkarregadu Elias Parra louva mós jornalista timoroan na´in-neen husi mídia imprensa, elektróniku no ajénsia notísia ne´e, ne´ebé hetan oportunidade ba formasaun dalen inglés, ba susesu no kompromisu ba jornalizmu ida ne´ebé responsável.

Nia mós insiste atu profisionál komunikasaun sosiál sira ne´e serbisu maka´as liután atu verifika faktu, buka fonte oioin no kontinua independente husi notísia ne´ebé halo, iha ámbitu kobertura.

“Imi-nia efetividade no konfiabilidade depende ba presizaun,” Enkarregadu Elias Parra akresenta hodi justifika razaun oferese Bolsa Estudu Marie Colvin Memorial.

Bolsa Estudu Marie Colvin Memorial lansa iha 2019, iha ámbitu komemorasaun Aniversáriu Referendum ba dala XX, nu´udar aktu ida hodi relembra korajen Marie Colvin nian bainhira halo kobertura kona-ba kauza Timór nian iha 1999.

Partisipa iha serimónia graduasaun primeiru jornalista timoroan na´in neen ba Programa Bolsa Estudu Marie Colvin Memorial mak Prezidente Conselho de Imprensa (CI), Virgílio da Silva Guterres, Xefe Gabinete Ministériu Asuntu Parlamentár no Komunikasaun Sosiál (MAPKOMS), Jorge Geraldo Gama inklui konvidadu sira seluk.

Jornalista: Rafy Belo

Editór: Cancio Ximenes

HAKEREK NO HATÁN

Please enter your comment!
Please enter your name here