Empreza distribuidór Jacnto Group iha Dili prepara sasán Sesta Bázika. Imajen/foti hosi Facebook

DILI, 22 dezembru 2020 (TATOLI)-Komisaun Anti-Korrupsaun (CAC) kontinua identifika infrasaun sira ne’ebé distribuidór sasán Cesta Bázika sira komete, liuliu iha relasaun ho sasán nia kuantidade la balansu ho nia valor osan.

Notísia Relevante : CAC kontinua analiza informasaun Cesta Bázika “fuhuk”

Adjuntu Komisariu CAC ba asuntu Prevensaun no Sensibilizasaun, Luis de Oliveira Sampaio. Imajen Tatoli/Egas Cristovão

Adjuntu Komisáriu ba Asuntu Prevensaun no Sensibilizasaun CAC, Luis Oliveira Sampaio, ohin, iha edifísiu CAC, relata katak, ekipa Espesialista Anti-Korrupsaun (EAK) hosi CAC, foin lalais ne’e, halo monitorizasaun ba distribuisaun sasán Cesta Bázika iha Munisípiu Aileu, Ainaro ho Bobonaro.

Iha monitoriza ne’e, Adjuntu CAC Luis Sampaio, informa, ekipa identifika kompañia   balun ne’ebé distribui sasán Cesta Bázika  ba benefisiáriu sira  la tuir   akordu ne’ebé Governu define. Mezmu nune’e, CAC halo hikas aproximasaun hodi orienta empreza fornesedór kumpre duni tabele ne’ebé define iha kontratu  entre Governu ho empreza distribuidór.

“Iha inspesaun ba munisípiu tolu ne’e identifika sasán nia folin la hanesan saida mak determina, sasán la to’o no balun la kompletu no sira seluk tan.  Maibé, ami halo aproximasaun sira hodi kompleta fali,” Luis Sampaio hateten.

Parte balun ne’ebé CAC identifika mós maka foos balun la’ós lokál ka foos-rai,  maibé kompañia distribuidór sira oferese fali foos ho marka FOLSOM. Nune’e, CAC fó hatene kedas hodi kompleta item foos-rai ka foos lokál.

“CAC  nia papél  iha inspesaun hodi halo prevensaun  karik iha buat ruma la tuir akordu hodi fó hanoin nune’e kompañia sira halo tuir no iha indísiu   sira seluk CAC bele halo medida represivu,” Luis Oliveira Sampaio afirma.

CAC mós sei hato’o  relatóriu inspesaun ne’e ba Primeiru-Ministru, Taur Matan Ruak, atu bele konsidera halo avaliasaun nesesáriu ruma saida mak identifika ne’ebé akompaña reaje sosiedade  hodi bele hadi’a liu-tan programa ne’e Cesta Bázika .

CAC kontinua halo monitorizasaun ativu ba prosesu distribuisaun programa Cesta Bázika ne’ebé daudaun kontinua la’o hodi garante efisiénsia no efikás ho nia finalidade  benefisia direita ba povu.

Jornalista: Nelson de Sousa

Editór: Francisco Simões

HAKEREK NO HATÁN

Please enter your comment!
Please enter your name here