Atividade inspesaun AIFAESA ba loja no kioske iha postu administrativu Same. Imajen/Mídia AIFAESA

DILI, 22 dezembru 2020 (TATOLI)Autoridade Inspesaun no Fiskalizasaun Atividade Ekonómika, Sanitária no Alimentár (AIFAESA) husu ba operadór ekonómiku bainhira sosa sasán iha ámbitu Natál no tinan foun, presiza tau atensaun tanba iha tempu loron boot mak distributór sira fa’an sasán ho folin baratu maibé prazu besik expira.

AIFAESA nu’udar instituisaun Estadu ne’ebé ho papél importante atu garante sirkulasaun kualidade sasán, liuliu hahán no hemu iha Timor-Leste.

Diretór Operasionál AIFAESA, Gabriel da Costa, hateten kada tinan autoridade ne’e sempre identifika bebeik katak produtu sira ne’ebé mak distributór sira fa’an iha tempu loron boot ho folin baratu tanba prazu la to’o fulan mate ona.

“Husu atu atensaun maka’as ba sasán sira ne’ebé mak distributór sira fa’an baratu no balun oferese gratuita de’it, ne’e di’ak maibé produtu sira bele liu prazu, akontesementu sira ne’e sempre akontese tinan-tinan,” Diretór Operasionál AIFAESA hateten ba Agência TATOLI, iha ninia knaar fatin, Matadoro, tersa ne’e.

Maski nune’e, durante dezembru AIFAESA seidauk identifika produtu a’at no liu prazu, maibé kona-ba manipula presu nesesidade bázika, autoridade simu keixa hosi populasaun.

Relasiona ho kestaun ne’e, iha tempu loron boot AIFAESA kontinua halo inspesaun ba distributór, supermerkadu inklui kios kiik sira ne’ebé mak fa’an sasán iha kapitál Dili no munisípiu.

“Ami-nia programa ba munisípiu mós kontinua la’o hela, ne’ebé ami-nia rekursu mós sufisiente hela, tanba ne’e daudaun ami nafatin halo inspesaun iha armajen distributór no loja hodi nune’e bele garante kualidade ai-han no mós produtu liu prazu no a’at,” Gabriel subliña.

Diretór ne’e dehan, AIFAESA kontinua fó informasaun ba operadór ekonómiku sira ne’ebé mak kontinua sosa produtu hosi distributór sira.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here