Embaixadór Xina iha TL, Xiao Jianguo entrega doasaun kamera imajen térmika ba Vise Ministru Interiór, António Armindo. Imajen/Embaixada Xina iha TL

DILI, 21 dezembru 2020 (TATOLI) – Governu Xina liuhosi nia embaixada iha Timor-Leste (TL), ohin, oferese kamera imajen térmika (thermal imaging camera) haat (4) no máskara 10.000 ba Ministériu Interiór (MI) no Servisu Migrasaun Timor-Leste.

Notísia Relevante : Xina entrega lampu dezinfektan COVID-19 ba MS

Serimónia doasaun ne’e hala’o iha edifísiu Embaixada Xina iha Dili ne’ebé entrega direta hosi Embaixadór Xiao Jianguo ba Vise Ministru Interiór, António Armindo, no diretór jerál Servisu Migrasaun, Superintendente Asistente Polísia Luis Soares Barreto.

Hafoin serimónia, António Armindo, esplika kamera haat ne’e ho marka espesiál ne’ebé ninia funsaun atu uza hodi sukat no bele kapta ema-nia temperatura.

Governante ne’e informa, Governu planeia atu tau kamera hirak ne’e iha fronteira sira hanesan, Mota Masin, Motain no Oe-Cusse, hodi fasilita no reforsa tan sistema servisu iha área fronteira durante períodu pandemia COVID-19.

“Materiál sira ne’e ita sei koloka ba iha fronteira sira hanesan Mota-Masin, Sakato no Motain. Ita iha ona ida iha Aeroportu Internasionál Prezidente Nicolau Lobato ne’ebé oferese mós hosi Xina,” António Armindo hateten.

Vise Ministru ne’e konsidera kamera hirak ne’e util tebes no importante tanba kada semana Timor – Leste loke fronteira, no bele uza hodi sukat ka deteta temperatura hosi ema-sira ne’ebé tama-sai.

Kona-ba máskara,  nia hateten, sei distribui ba membru Polísia Nasionál Timor – Leste (PNTL) sira hotu liu-liu hirak ne’ebé servisu iha fronteira.

Antes ne’e,  Xina oferese ona materiál prevensaun COVID-19 nian ba Governu atu luta kontra propagasaun peste letál  ne’e iha Timor-Leste.

 Jornalista: Hortencio Sanchez

Editór: Francisco Simões

HAKEREK NO HATÁN

Please enter your comment!
Please enter your name here