DILI, 21 dezembru 2020 (TATOLI)- Provadoria Direitu Umanu no Justisa (PDHJ) liuhosi Provedór Adjuntu ba Area Boa Governasaun, José Telo S. Cristovão, kontinua husu ba servidór públiku sira iha instituisaun Estadu atu kontinua promove boa governasaun.
Notísia Relevante : PDHJ rejista kazu 242 ba violasaun direitu umanu no pratika governasaun ladi’ak
“Mai ita hamutuk promove boa governasaun hodi lori dezenvolvimentu ba povu ho prósperu,” Adjuntu Provedór, José Telo S. Cristovão, hateten iha nia intervensaun iha ámbitu lansamentu publikasaun PDHJ nian ba relatóriu investigasaun iha trimestre IV 2020, ohin, iha edifísiu PDHJ, Caicoli, Dili.
PDHJ estabelese tuir mandanmentu Konstituisaun Repúblika Demokrátika Timor-Leste, artigu 27 nu’udar órgaun independente ida-ne’ebé iha funsaun atu apresia no buka dalan atu atende sidadaun sira-nia keixa hasoru podér públiku, bele atu haree ida-idak la’o tuir lei ka la’e, prevene injustisa no hala’o prosesu atu hadi’a injustisa.
Atu bele implementa kna’ar ho di’ak, PDHJ halo ona polítika no implementa ona planu estratéjiku ba tinan 10, hahú hosi 2011 to’o 2020 ne’ebé define meta estratéjika haat hanesan, dahuluk kona-ba autoridade públiku sira iha koñesimentu ne’ebé di’ak kona-ba direitu umanu iha nivel institusionál.
Daruak, autoridade sira bele halo prevensaun no korresaun ba violasaun prinsípiu direitu umanu no boa governasaun.
Datoluk, ema vulneravel sira iha protesaun hasoru abuzu direitu umanu no bele hetan asesu di’ak ba atendimentu públiku no ikus dahaat maka asesu PDHJ nia kapasidade no independénsia hodi garante implementasaun ba nia mandatu ho di’ak.
PDHJ mós hala’o ona konsultasaun públiku hodi halo revizaun ba planu estratéjiku periodu tinan lima 2021-2025 hodi bele implementa.
Jornalista : Nelson de Sousa
Editór : Francisco Simões
