Ilustrasaun vasina COVID-19. Imajen/Espesiál

DILI, 21 dezembru 2020 (TATOLI)Ministériu Saúde halo aprezentasaun ida iha reuniaun Konsellu Ministru (KM) kona-ba esfosu Governu ba akizisaun vasina kontra moras COVID-19.

“Vise-Ministru Saúde, Bonifácio Maukoli dos Reis, aprezenta informasaun ba Konsellu Ministru kona-ba esforsu Governu ba akizisaun vasina kontra COVID-19 no mós kona-ba planu distribuisaun vasina iha Timor-Leste,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata enkontru KM, iha Palásiu Governu, segunda ne’e.

Maski nune’e, seidauk hatudu detalla kona-ba montante vasina ne’ebé Governu atu halo akizisaun.

Tuir informasaun ne’ebé fó sai husi Vise-Ministru Saúde, Governu realiza esforsu tomak ne’ebé nesesáriu ho apoiu parseiru dezenvolvimentu atu haree ba akizisaun vasina kontra COVID-19.

Tuir dadus  husi MS, to’o ohin rejistu sidadaun 15.619 maka tuir ona teste laboratóriu no nai’in-349 maka hein rezultadu.

Totál pasiente konfirmadu 31, provável haat no rekuperadu 35, enkuantu teste hamutuk 15.239 maka hatudu rezultadu negativu.

Totál kuarentena obrigatóriu to’o segunda ne’e, hamutuk 259, Dili iha ema na’in-197 no seluk iha munisípiu, no auto-kuarentena 241.

No sira ne’ebé maka pasa ona kuarentena obrigatóriu durante loron 14 hamutuk 6.784, iha  Dili 5.641 no seluk iha munisípiu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here