Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, Segunda (21/12). Imajen TATOLI/Egas Cristovão

DILI, 21 dezembru 2020 (TATOLI)Ajénsia Kooperasaun Internasionál Koreia (KOIKA, sigla inglés) sei oferese osan ho montante millaun $6,5 ba Governu Timor-Leste ne’ebé destina atu hasa’e partisipasaun joven iha área desportu.

Relasiona ho apoia ne’e, Ministru Edukasaun, Juventude no Desportu, Armindo Maia, halo aprezentasaun preliminár ida iha reuniaun Konsellu Ministru (KM) ba projetu kooperasaun iha área desportu, entre Ministériu Edukasaun, Juventude no Desportu (MEJD) no KOIKA.

“Projetu ne’e, ho valór millaun $6,5, hodi aumenta partisipasaun labarik no joven sira iha desportu, liuliu ba modalidade futeból liuhosi konstrusaun infraestrutura, no instalasaun”, Ministru Prezidénsia Konsellu Ministru, Fidelis Manuel Leite Magalhães, relata hafoin ramata enkontru KM, iha Palásiu Governu, segunda ne’e.

Aprezentasaun ba ezekutivu sira ho objetivu informa kona-ba kooperasaun, ne’ebé tempu oin mai sei submete proposta ida ba Prezidénsia Konsellu Ministru, atu nune’e bele endosa MEJD bele iha kompeténsia asina akordu ida ho Governu koreanu hodi estabalese inisiativa ne’e.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here