Prezidente Conselho de Imprensa (CI), Virgílio da Silva Guterres, sai oradór iha Semináriu Nasionál kona-ba “Vantajen no Dezvantajen Dijitalizasaun Rádiu Komunidade iha Hato’o Informasaun ba Públiku”. Imajen/Mídia CI.

DILI, 21 dezembru 2020 (TATOLI)—Prezidente Conselho de Imprensa (CI), Virgílio da Silva Guterres, hateten iha era dijitalizasaun agora ne’e públiku presiza hetan informasaun ne’ebé loos no adekuadu hosi governante sira.

“Ita agora iha era dijitalizasaun entaun programa ka planu atu dijitaliza komunikasaun ne’e, importante liu mak públiku hetan informasaun hosi Governu tenke loos no adekuadu. Nune’e, semináriu nasionál ne’e parte ida hodi hakonu direitu povu ninian katak sira (públiku) bele hetan informasaun ne’ebé loos no adekuadu hosi governante sira,” Virgílio da Silva Guterres hateten ba jornalista sira bainhira partisipa iha semináriu nasionál kona-ba “Vantajen no Dezvantajen Dijitalizasaun Radiu Komunidade iha Hato’o Informasaun ba Publiku” iha salaun SEII, Obrigado Barack, Dili, segunda ne’e.

Virgílio da Silva Guterres hateten, Governu Timor-Leste moris iha tempu miliniál no dijitalizasaun nian, tanba ne’e mak iha inisiativa ne’ebé mak di’ak hodi responde duni ba situasaun atuál. Nune’e, nia informa, planu dahuluk mak ajusta transformasaun ka revolusaun teknolójia ba informasaun ne’ebé akontese iha Timor-Leste.

Aleinde dijitalizasaun ba meiu hirak ne’e, nia hateten, presiza esforsu mós halo dijitalizasaun iha fatin sira seluk atu la’o hanesan mak iha literasia dijitalizasaun katak tenke hasa’e mós kapasidade públiku nian atu absolve informasaun sira-ne’e liuhosi mídia dijitál.

Nia dehan, dijitalizasaun katak públiku la presiza tuur loke rádiu iha uma de’it maibé kapasidade ema-nian atu uza telemóvel hodi asesu ba informasaun liuhosi rádiu iha fatin ne’ebé de’it. Maibé, tuir nia, buat hirak ne’e presiza prosesu naruk ida-ne’ebé baibain ema dehan literasia dijitalizasaun.

“Konsellu Imprensa nia planu mós atu koopera ho instituisaun relevante atu nune’e hasa’e kapasidade ita-nia sosiedade ninian hodi hatene utiliza meiu komunikasaun ne’ebé mak dijitál desentraliza, la’ós iha Dili de’it,” nia hateten.

Prezidente CI ne’e hateten, presiza desentraliza dijitalizasaun iha área rurál labele konsentra de’it iha nasional, tanba Conselho de Imprensa (CI) nia mandatu ida mak apoiu jornalista atu kapasita sira-nia koñesimentu prefisionál no mós intelektuál.

Agora daudaun, nia hateten, CI hatene ona katak jornalista barak mak sai voluntáriu iha rádiu komunidade sira entaun ho ne’e CI iha kanál ba hamutuk ho rádiu komunidade sira hodi fó formasaun balun ne’ebé durante ne’e CI hala’o hamutuk ho UNDP.

“Treinamentu jornalista kompreensivu ami hala’o no loke mós espasu ba jestór rádiu komunidade sira atu tuir informasaun liuliu kona-ba oinsá atu halo kobertura ba informasaun,” nia dehan.

Tuir nia, mezmu naran mak rádiu komunidade maibé sira mós iha kapasidade atu hato’o informasaun hosi sira-nia komunidade rasik. Tanba ne’e, nia dehan, CI kontinua loke espasu no tau matan ba jestór rádiu komunidade sira hodi hasa’e sira-nia kapasidade.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here