Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, Segunda (21/12). Imajen TATOLI/Egas Cristovão

DILI, 21 dezembru 2020 (TATOLI)-Liuhosi reuniaun Konsellu Ministru (KM), Governu delibera hodi propoin ba Prezidente Repúblika, Francisco Guterres ‘Lú Olo’, renova Estadu Emerjénsia (EE) ba da-ualuk, ba loron-30 tan.

“Governu delibera atu husu estensaun Estadu Emerjénsia ba Prezidénsia Repúblika no karta pedidu ne’e Primeiru-Ministru asina ona no sei haruka ba Xefe Estadu,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata enkontru KM, iha Palásiu Governu, segunda ne’e.

Portavóz Governu ne’e afirma, haree ba evolusaun situasaun epidemiolójika no proliferasaun ba kazu rejistadu COVID-19 iha nível rejionál, no mundiál, maka atu evita no neutraliza risku propagasaun tenke proteje saúde públika no iha kbiit atu hatán ba Sistema Nasionál Saúde nian.

“Governu konsidera renovasaun Estadu Emerjénsia permite atu suspende ka limita direitu sirkulasaun internasionál, sirkulasaun no fiksasaun rezidénsia no rezisténsia nian,” nia akresenta.

Entretantu, Prezidente Repúblika Francisco Guterres ‘Lú Olo’, iha 03 dezembru 2020, dekreta Estadu Emerjénsia da-ualuk ba loron-30, hahú husi tuku 00.00 iha 04 dezembru 2020 no termina iha tuku 23.59 iha 02 janeiru 2021, iha territóriu nasionál tomak.

Estadu Emerjénsia sei parsialmente suspende direitu ba sirkulasaun internasionál, liberdade sirkulasaun no fixasaun rezidénsia ba kualker pontu iha territóriu nasionál no direitu ba rezisténsia.

Autoridade públika kompetente sei impoin restrisaun nesesária sira ba redusaun risku hada’et nian no ezekuta medida prevensaun no kombate epidemia, hanesan distansiamentu sosiál, kuarentena ba suspeitu infesaun, izolamente ba moras no suspeitu sira, konfinamentu domisiliáriu, uzu obrigatóriu máskara, fase-liman no distánsia fízika.

Prezidente Repúblika dekreta Estadu Emerjénsia hafoin Parlamentu Nasionál iha 03 dezembru hodi fó autorizasaun ba renovasaun.

Jornalista:Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here