Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, Segunda (21/12). Imajen TATOLI/Egas Cristovão

DILI, 21 dezembru 2020 (TATOLI)VIII Governu Konstitusionál liuhosi reuniaun Konsellu Ministru (KM) deside troka Prezidente Autoridade Munisipál Baucau, Administradór Munisípiu  Viqueque no Lautém.

Ministru Administrasaun Estatál, Miguel Pereira de Carvalho, aprezenta projetu rezolusaun Governu ne’ebé hetan aprovasaun husi ezekutivu.

“Projetu rezolusaun Governu tolu ba nomeasaun Olívio Freitas ba kargu Prezidente Autoridade Munisipál Baucau, Domingos Sávio ba kargu Administradór Munisípiu Lautém no Januário Soares ba kargu Administradór Munisípiu Viqueque,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata enkontru KM, iha Palásiu Governu, segunda ne’e.

Portavóz Governu ne’e akresenta, Prezidente Autoridade munisipál foun sira ne’ebé hetan nomeasaun, sei hala’o kargu iha rejime komisaun servisu iha períodu tinan lima, sura husi loron simu pose.

Iha tempu hanesan ezonera na’in-tolu seluk ne’ebé mak ezerse hela funsaun liuhosi subtituisaun ba knaar durante tinan hirak nia laran to’o agora, ne’ebé kaer hela kargu no nomeasaun foun.

Hosi rezolusaun ne’e fó mós knaar ba Ministru Administrasaun Estatál ho nia ekipa hodi halo preparasaun ba tomada pose.

Kandidatu autoridade munisipál tolu hamutuk na’in-24, maibé ema na’in-23 de’it maka tuir ezame, ida la mai tuir teste tanba ne’e ekipa organizadora esklui.

Kritériu atu sai prezidente autoridade tenke funsionáriu públiku no iha grau tékniku superiór, maibé bainhira laiha grau ne’e tenki ezerse kargu dirijente hanesan funsionáriu públiku.

Bainhira la’ós funsionáriu públiku, idade tenke tinan 45 ba leten no iha esperiénsia profisionál iha aréa administrasaun pelu menus tinan-lima no kritériu seluk tan.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here