Estudante finalista ESJTV Sao Miguel Arcanjo Dili. Imajen espesial.

DILI, 21 dezembru 2020 (TATOLI)—Estudante finalista hamutuk na’in 584 husi Eskola Ensinu Sekundária Jerál 10 de Dezembru, segunda ne’e, simu ona envelope ho rezultadu pursentu 100 pasa hotu kedas iha ezame nasionál  (EN) hodi hakat ba universidade.

Diretór Eskola ESJ 10 de Dezembru, Domingos Sávio Gusmão, hateten antes ne’e, eskola rejistu estudante finalista hamutuk na’in 591, maibé na’in 7 la partisipa iha ezame nasionál tanba la hatama dokumentu hanesan diploma no seluk tan.

 Notísia Relevante:Estudante rihun 53-resin pasa EN, 1.647 reprovadu

“Estudante finalista desimu segundu hamutuk 591 maibé na’in 7 bainhira eskola rekolla dokumentu estudante sira atu aprezenta ba Ministériu Edukasaun sira lakon kedan paradeiru to’o ohin loron,” informa Domingos Xavio Gusmão, ba Tatoli iha ninia servisu fatin comoro, Dili, ohin.

Iha parte seluk, nia dehan daudaun ne’e eskola públiku prepara ona prosesu inskrisaun ba estudante foun ba tinan letivu 2021.

Tanba tuir orariu inskrisaun dahuluk sei hala’o iha loron 22 to’o 23, no faze daruak sei realiza iha loron 26 to’o 27 fulan-dezembru.

Prosesu aprendizajen ba tinan letivu 2021 nian sei hal’o fiafali iha loron 13 fulan oin.

“Número inskrisaun ba ita-nia estudante foun laiha mudansa kada tinan ita sempre simu estudante purvolta 650 tuir nafatin número ne’ebé ita deside ona,” tenik tan.

Eskola Ensinu Sekundária Jerál 10 de Dezembru iha sala aula hamutuk 11, tanba ne’e kada sala sei koloka estudante entre 75 to’o 80.

Notísia Relevante:Rezultadu Ezame Nasionál Sai Instrumentu Sukat Dezempeñu Estudante

Jornalista :Tomé Amado

Editór:Agapito dos Santos  

HAKEREK NO HATÁN

Please enter your comment!
Please enter your name here