AD. SLB Laulara sai runner-up ka segundu lugar iha Tasa Rosa "Muki" Bonaparte 2020. Imajen/FFTL

DILI, 20 dezembru 2020 (TATOLI)—Prezidente Federasaun Futeból Timor-Leste (FFTL), Francisco Jerónimo, konsidera atividade Liga Feto Timór (LFT) no tasa Rosa Muki Bonaparte hanesan meiu ida hodi buka fini ba selesaun nasionál feto, nune’e bele ba kompete iha eventu internasionál sira.

“Automátikamente presiza fini jogadora feto ba jogu internasionál iha Ázia, ne’ebé kona-ba feto ita iha ona jogadora preparadu,” Prezidente Federasaun ne’e hateten iha Estádiu Munisipál Dili, domingu ne’e.

Nia dehan, LFT no tasa Rosa “Muki” Bonaparte hanesan atividade permanente, tanba ne’e kada tinan sei hala’o nafatin hodi fó oportunidade ba jogadora sira.

Atividade ne’e hetan finansiamentu hosi Federation International Football Asosiation (FIFA) no Asian Football Confederation (AFC).

Ba oin, FFTL iha ona hanoin atu halo LFT sai boot liután hodi aumenta tan klube sira iha primeira divizaun, bele sa’e to’o 10 no segunda divizaun mós hanesan.

Enkuantu, daudaun ne’e klube feto ne’ebé iha ona primeira divizaun hanesan AD. SLB Laulara, Academica FC, Buibere FC, S’Amuser no Maranatha FC.

Klube ne’ebé iha segunda divizaun mak hanesan, VDL FC, ASS. Baucau, Nain-Feto, São José, Maudoko FC no UNITAL.

Jornalista: Hortêncio Sanchez

Editora: Julia Chatarina

HAKEREK NO HATÁN

Please enter your comment!
Please enter your name here