Ministru Kordenadór Asuntu Ekonómiku Joaquim Amaral, Vise-Ministru Turizmu, Komérsiu no Indústria Domingos Lopes Antunes, lansa distribuisaun Cesta Bázika iha suku Vemasse Tasi, domingu (20/12). Imajen TATOLI/Natalino Costa

BAUCAU, 20 dezembru 2020 (TATOLI)—Komunidade hamutuk 3.914 husi suku Vemase Tasi, postu administrativu Vemasse, munisípiu Baucau, simu produtu Cesta Bázika ne’ebé hanesan programa Governu iha ámbitu rekuperasaun ekonómika.

Xefe Suku Vemasse Tasi, Sérgio Freitas, agradese tanba maski seremónia ne’e hala’o iha loron domingu, maibé komunidade sira la lakon oportunidade hetan direitu produtu ai-han.

“Ha’u kontente ohin Ministru no Vise-Ministru maka mai lansa distribuisaun Cesta Bázika ba komunidade suku ne’e, tanba ne’e husu ba komunidade sira ne’ebé simu produtu ne’e hodi ba han hamutuk ho família, maski oituan maibé oportunidade, tanba ne’e tenke aproveita ho di’ak,” Autoridade lokál ne’e dehan liuhosi intervensaun iha seremónia distribuisaun Césta Bázika iha suku Vemase Tasi, domingu ne’e.

Nu’udar autoridade lokál, nia parte apela ba komunidade atu valoriza produtu ne’ebé simu.

Iha fatin hanesan, komunidade suku Vemase Tasi, André de Sá, konsidera programa ne’e di’ak maski la’o iha tempu badak.

“Programa ne’e di’ak, maski durante ne’e hetan krítika barak liu maibé di’ak ba povu no ha’u atu husu de’it program hanesan ne’e labele to’o iha ne’e de’it maibé se bele kontinua nafatin,” nia fó hanoin.

Nune’e mós, benefisiáriu iha suku hanesan, Jacinto da Silva, nota katak programa ne’e di’ak maibé presiza hadi’a jestaun distribuisaun.

“Se bele labele fahe de’it ba suku, maibé Governu presiza fahe ba to’o aldeia sira nune’e komunidade sira bele sente hotu programa Governu,” nia fó hanoin.

Entertantu, seremónia ne’e partisipa husi Ministru Kordenadór Asuntu Ekonómiku Joaquim Amaral, Vise-Ministru Turizmu, Komérsiu no Indústria Domingos Lopes Antunes, Prezidente  Sentru Lojíztika Nasionál (CLN, sigla portugés), Prezidente Autoridade Baucau, Administradór postu Vemasse, ekipa Autoridade Inspesaun no Fiskalizasaun Atividade Ekonómika, Sanitária no Alimentár (AIFAESA) inklui komunidade lokál.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here