KIDA selebra aniversáriu dahuluk iha salaun MSSI, Caicoli, domingu (20/12). Imajen TATOLI/Florêncio Miranda Ximenes

DILI, 20 dezembru 2020 (TATOLI)Komisaun Instaladora ba Desterradu Ataúru (KIDA) 1980-1987 hakarak hametin unidade ema desterradu sira hodi kontribui ba dezenvolvimentu nasionál liuliu kombate kiak no mukit.

Komisaun ne’e realiza aniversáriu dahuluk ho tema ‘Hametin Unidade fó Esperansa ba Istória Desterradu Ataúru’ inklui realiza misa agradesementu no tau ai-funan iha tasi-ibun Motael no Santa Cruz, Dili.

“Ami kria komisaun atu halibur filafali ita-nia maluk desterradu sira, ne’ebé iha tempu ne’ebá hasoru forsadamente husi tropa Indonézia, halo torturasaun no presaun oin-oin inklui kapturasaun iha Ataúru tanba mai hosi família FALINTIL, liuliu relasaun importante ba guerrilleiru,” Koordenadór KIDA, Agostinho Gregório Ramos, iha salaun Ministériu Solidaridade Sosiál no Inkluzaun (MSSI), Caicoli, domingu ne’e.

Koordenadór KIDA, Agostinho Gregório Ramos. Imajen TATOLI/Florêncio Miranda Ximenes

Komisaun ne’e harii iha 2019 atu konsolida eis desterradu Ataúru sira husi dadus Cruz Vermelha Internasionál kuaze ema na’in-7.000 ne’ebé rezidente iha munisípiu hotu.

Iha tinan 1980, desterradu hirak ne’e mak iha Atáuru no iha 1987 balun maka tropa Indonézia lori fila ba ida-idak ninia munisípiu, maibé kontinua reziste no kontribui ba prosesu luta libertasaun Timor-Leste to’o ukun rasik.

“Iha ukun-an ne’e ita presiza halibur hamutuk fali sira hodi bele harii organizasaun ho prinsípiu ida hametin istória atu kontribui ba prosesu dezenvolvimentu nasionál,” dehan eis desterradu Ataúru ne’e.

Nune’e, KIDA planu ona atu estabelese komisaun sira iha kada munisípiu atu hahú halo preparasaun ba kongresu iha jullu 2021, ne’ebé daudaun komisaun instaladora nafatin halo konsolidasaun.

Programa haat importante ne’ebé sei realiza maka hahú konsolidasaun ba eis desterradu Ataúru iha territóriu tomak, hala’o kongresu munisipál, kongresu nasionál ho nia relatóriu ezekusaun, no programa atividade ba organizasaun KIDA ba tinan 2021.

Agostinho subliña, komisaun nia planu mak atu kontribui programa di’ak iha setór ekonomia, liu-liu programa iha setór agrikultura, identifika no halibur sira hotu hodi hakbesik programa.

“Ami hakarak buka tuir maluk sira ne’e hodi konta istória, nune’e jerasaun foun sira bele hatene istória loloos hodi kontribui ba dezenvolvimentu nasionál,” nia afirma.

Nia rekomenda ba Estadu Timor-Leste atu hakerek desterradu sira-nia istória ho loloos no valoriza sira-nia terus no susar durante luta libertasaun nasionál.

Seremónia aniversáriu dahuluk ne’e partisipa husi luta na’in ho nia jerasaun iha munisípiu 12, Jerasaun Patriota, José Lobato no Prezidente Konsellu Kombatente Libertasaun, Vidal de Jesu “Riak Leman’ no reprezentante husi Cruz Vermellha Timor-Leste.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here