Eis desterradu Ataúru, João Mouzinho Sarmento Lay. Imajen TATOLI/Florêncio Miranda Ximenes

DILI, 20 dezembru 2020 (TATOLI)Eis desterradu ka dadur iha Ataúro husi suku Dare, postu administrativu Vera Cruz, munisípiu Dili, João Mouzinho Sarmento Lay, haktuir iha 1980 to’o 1987, desterradu husi munisípiu 12 ne’ebé tropa Indonézia kaptura no lori bá Ataúro, balun mate ho hamlaha no moras tanba laiha hahán no ai-moruk.

Iha 10 juñu 1980, João Mouzinho ho ninia kaben, Maria Amelia de Fátima, hamutuk ho oan na’in-haat, hetan kapturasaun husi tropa Indonézia tanba kontaktu ho guerrilleiru sira hodi fó hahán inklui planeia atu FALINTIL sira asalta tropa sira-nia fatin iha Dare, ne’ebé tropa Indonézia rua mate maté iha área ne’e.

Hafoin kaptura, nia dehan, tropa Indonézia lori ba sulan iha KODIM DILI durante loron no kalan rua, ne’ebé tropa Indonézia sira mós baku no balun hetan oho inklui halo violasaun seksuál hasoru feto sira.

“Tula ami ho ró iha tempu kalan hodi bá oho no soe ba tasi laran no seluk tula ami bá Ataúro. Ami foufoun bá ne’e uma, hahán no ai-moruk laiha, ne’ebé desterradu labarik no ema boot sira mate barak ho hamlaha no moras iha Ataúru,” eis desterradu João, konta tuir hafoin selebra aniversáriu dahuluk KIDA iha salaun Ministériu Solidaridade Sosiál no Inkluzaun (MSSI), domingu ne’e.

Tuir eis dadur ne’e, bainhira iha Ataúro, durante tinan-ida kondisaun susar tebes tanba hahán limitadu.

“Ami han de’it batar fuhuk, liuliu konsume hahán ne’ebé laiha kondisaun. Ami desterradu sira mak ajuda malu hodi fahe hahán ba malu no ami halo belun ho rai-na’in hodi fó marungi tahan no batar fuhuk atu tahan netik ami-nia moris inklui fó nuu tahan atu halo uma, maibé labarik sira susar tanba laiha hahán,” nia akresenta.

Iha tinan 1981 to’o 1982, Cruz Vermelha Internasionál to’o iha Ataúro hodi fó apoia hahán no ai-moruk atubele salva dadur sira-nia moris.

“Momentu ema ka’er ami, bá ho isin lolon de’it no Cruz Vermelha Internasionál la bá hasoru no maluk sira Ataúru la fó rai hodi ami halo to’os, kuda batar no ai-farina, tanba ne’e barak maka mate,” nia dehan ho triste.

Iha tinan 1985, eis desterradu ne’ebé moris iha loron 02 janeiru 1969, ho nia família konsege fila hikas mai iha Dili ka hela fatin Dare, maski nia-oan feto ida mate iha Ataúru tanba moras.

Ho kondisaun hirak ne’e iha pasadu, maka eis dadur ne’e rekomenda ba Governu atubele tau matan no fó valór ba desterradu sira no família ne’ebé mate tanba hakarak luta ba libertasaun pátria.

“Ami kastigu iha Ataúro ne’e la’ós naran kastigu de’it maibé tanba funu, tanba ne’e ami husu tenke tau matan. Ami hahú organiza malu ona atu hametin istória hodi kontribui ba dezenvolvimentu nasionál,” nia subliña.

Iha tinan 2019, estabelese Komisaun Instaladora ba Desterradu Ataúru (KIDA) 1980-1987 ho objetivu hakarak halibur no hametin unidade ema desterradu sira hodi kontribui ba dezenvolvimentu nasionál, liuliu kombate kiak no mukit.

Tuir dadus Cruz Vermelha Internasionál kuaze eis desterradu na’in-7.000 ne’ebé mak rezidente iha munisípiu tomak.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here