Produtu Cesta Bázika iha bote Imajen TATOLI/Antónia Gusmão

BAUCAU, 20 dezembru 2020 (TATOLI)—Prezidente Autoridade munisípiu Baucau, António Guterres, husu Governu hadi’a mekanizmu distribuisaun programa Cesta Bázika nune’e bele prevene labele akontese tan dadus dupla.

“Governu mai  halo distribuisaun produtu Cesta Bázika tenke aprezenta dadus, nune’e labele hanesan apoiu agregadu família ho osan $200 ne’ebé to’o agora la hotu, ida-ne’e tenke sai referénsia ba ita”, António dehan domingu ne’e iha seremónia distribuisaun Cesta Bázika iha suku Vemasse Tasi, postu administrativu Vemasse, munisípiu Baucau.

Biban ne’e, nia husu ba komunidade koopera ho ministériu implementadór nune’e prosesu distribuisaun bele la’o ho di’ak.

“Ha’u hakarak husik hela referénsia ba ita bo’ot sira, hanesan sidadaun, ha’u merese atu hetan karik hetan oinsá, diálogu antes ne’e ho líder sira tenke submete dadus”, nia fó hanoin.

Hatan kona-ba kestaun ne’e, Vise-Ministru Turizmu, Komérsiu no Indústria, Domingos Lopes Antunes, hateten dadus benefisiáriu Cesta Bázika ne’e mai husi Ministériu Administrasaun Estatál (MAE) ne’ebé submete husi autoridade lokál sira.

“Dadus prepara husi ita-nia xefe suku sira, tanba ne’e ha’u hanoin distribuisaun ne’e sei la’o tuir korridór ne’ebé maka iha”, nia akresenta.

Antes ne’e, MAE submete dadus populasaun hamutuk millaun 1,5 ba Ministériu Koordenadór Asuntu Ekonómika (MKAE) atu simu produtu Cesta Bázika.

MAE halo ona verifiaksaun diretamente ho xefe suku no xefe aldeia sira, ne’ebé la rejistu foun tanba bazeia dei’t ba kartaun ficha família ne’ebé rejista to’o loron 11 maiu 2020.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here