Bonifacio Martins.Imajen/Hortencio Sanchez.

LIQUIçA, dezembru 2020 (TATOLI)—Graduadu Bonifácio Martins Soares husi Institutu São João Brito Casait, Munisípiu Liquiça hetan  predikadu cum laude  ho valór index prestasi (IP) 3.70  durante graduasaun daruak  hafoin institute ne’e hamrik iha tinan hirak liubá.

Bonifácio ne’ebé estuda iha Fakuldade Edukasaun Departementu Língua Portugeza sente kontente no agradese ba kontribuisaun husi parte hotu ne’ebé fó tulun durante prosesu aprendizajen.

Notísia Relevante :Estudante ISJB na’in 20 simu graduasaun

“Ha’u hato’o ha’u nia sentidu gratidaun, kontente, tanba rezultadu ida ne’e la’ós ha’u mesak mak esforsu-an, maibé kontribui hosi parte hotu ho maneira oioin,” Bonifácio  dehan hafoin simu graduasaun iha Casait iha kinta (17/12).

Estudante husi Munisípiu Liquiça  ne’e mós konsiente katak, sei la to’o iha ne’e de’it no sei la kontente de’it ho valór ne’ebé nia hetan iha ezame finál ne’e, maibé promete atu kontinua la’o nafatin ba oin hodi kontribui matenek ne’ebé iha ba nasaun no sai hanesan ajente transformadór iha sosiedade.

“Prinsípiu ha’u nian mak ne’e, sai hanesan ajente transformadór hodi serbi ba nasaun no ba ema hotu laiha rezerva. Oportunidade iha atu ha’u kontinua estudu ba oin, ha’u prontu,” nia dehan.

Hosi valór di’ak ne’e, ISJB oferese medalla apresiasaun osan me’an tolu no osan mutin ida ba estudante Bonifácio.

Bonifácio moris iha Ulmera Liquiça 03 Maiu 1998, oan hosi Francisco Martins Soares no Virgina Sarmento.

Nia hahú eskola primária iha tinan 2004 to’o 2009, kontinua kedan ba ensinu pré sekundária no ramata iha 2013.

Iha 2014, Bonifácio kontinua estudu iha Eskola Sekundária Tékniku Vokasionál Dili, hahú hosi to’o 2016, no iha 2017 hahú  estuda iha ISJB to’o ramata lisensiatura iha 2020.

Entretantu, valór predikadu ba graduadu sira iha kategoria haat, sufisiente 2.00 to’o 2.49, bom ho valór 2.50 to’o 2.99, muito bom ho valór 3.00 to’o 3.49 no com laude ho valór 3.50 to’o 4.00.

Notísia Relevante :ANAAA Sei Avalia IPB ho ISJB

Jornalista: Hortencio Sanchez

Editór: Agapito dos Santos

HAKEREK NO HATÁN

Please enter your comment!
Please enter your name here