UNPAZ hala’o serimónia graduasaun tinan akadémiku 2020 ba etapa dahuluk, sábadu (19/12). Imajen/UNPAZ

DILI, 19 dezembru 2020 (TATOLI) – Magnífiku Reitór Universidade da Paz (UNPAZ), Adolmando Soares Amaral, husu ba antigu alunu sira Universidade da Paz nian atu kontinua hatudu obrigasaun morál ba UNPAZ no ba sosiedade.

Notísia Relevante : 2020, UNPAZ prodús lisensiatura 1,412 no mestradu 24

Magnífiku Reitór UNPAZ, Adolmando Soares Amaral. Imajen/UNPAZ

“Ha’u hakarak dehan de’it katak ohin númeru antigu alunu UNPAZ nian aumenta tan sura ho ita boot sira. Ha’u husu bá ita boot sira tenke sai antigu alunu ne’ebé iha responsabilidade no morál,” afirma Adolmando Soares Amaral iha nia diskursu iha serimónia graduasaun faze dahuluk  tinan akadémiku 2020 , ohin, iha salaun UNPAZ, Dili.

Nia subliña, antigu alunu UNPAZ nian la bele simu  tiha graduasaun no fila ba sosiedade lakon morál no at liu tan husik hela responsabilidade ba instituisaun ne’ebé mak durante tinan haat fó matenek.

Nia kompara katak prosesu moris ne’e dinámiku, laiha ema ida mak imajina se karik tempu ruma antigu alunu sira balun bele asume fali kna’ar nu’udar reitór, dekanu vise reitór no dosente iha  UNPAZ. Tanba ne’e, importante tebes atu hatudu nafatin responsabilidade morál.

Ba estudante finalista sira ne’ebé simu graduasaun ne’e, Adolmando hateten, hosi 2016 bainhira integra-aan iha UNPAZ nu’udar estudante buat barak mak akontese ho  prosesu akadémiku mak kulturalmente la’o iha instituisaun ne’e, koñesimentu no abilidade ne’ebé mak atu loke dalan oinsá atu hakat bá oin,

“Ha’u fiar ho matenek koñesimentu no abilidade ne’ebé iha, imi sei sai figura foun iha komunidade no sosiedade nia leet. Naran katak responsabilidade no morál ne’ebé imi hetan iha família no mai haburas tan iha instituisaun ne’e tenke lakan bá beibeik,” nia tenik.

2021, transforma kualidade instituisaun

UNPAZ hala’o gradusaun tinan akademiku 2020 ba etapa dahuluk, sabádu (19/12). Imajen/UNPAZ

Iha biban ne’e, Magnífiku Reitór UNPAZ, Adolmando Soares Amaral relata katak iha juñu, tinan foun 2021, UNPAZ  sei responde frakeza sira ne’ebé mak  Ajénsia Nasionál ba Avaliasaun no Akreditasaun Akadémika (ANAAA) rekomenda tenke hadi’a no hasa’e ninia kualidade iha instituisaun.

Reitór Adolmnado Soares Amaral dehan, avaliasaun instituisaun ne’ebé ANAAA halo ona UNPAZ hetan akreditasaun dala ida no re-akreditasaun mós dala ida no to’o agora UNPAZ ne’e seidauk iha kapasidade atu muda no transforma ninia estatutu hosi great C bá B.

“Ita iha frakeza ne’ebé mak peritu sira hosi ANAAA rekomendasaun kuandu hakarak hasa’e kualidade iha instituisaun ne’e ita tenke muda mentalidade ida uluk ne’ebé hanorin estudante tuir ita nia hakarak, ne’e labele akontese tan iha UNPAZ,” Adolmando afirma.

Nia dehan kuandu ema hotu iha UNPAZ ne’e mak hamrok duni  bá kualidade dalan ida de’it mak labele alerjia bá reforma no kualidade, tenke apoiu no suporta malu no hahú ba oin prosesu ensinu aprendizajen ba estudante sira tenke iha ona uniforme.

La’ós uniforme de’it, tuir Adolmando katak  presiza suporta no apoiu malu liuhosi prosesu ida mak rekursu sira iha UNPAZ tenke hatene prodús manual, tenke iha kapasidade atu halo planu lisaun no planu sesaun no power point atu nune’e bele sai pakote disiplina ida hodi garante duni kualidade iha instituisaun ne’e.

Portantu husi esforsu sira ne’e hotu, Adolmando konfesa katak saida mak UNPAZ sei halo iha 2021 hodi garante kapasidade abilidade no koñesimentu atu garante kualidade mak sei hahú ho formasaun bá ninia rekursu sira, hodi nune’e, dosente sira bele iha koñesimentu kle’an molok atu transmite fali matéria bá estudante sira.

Nia afirma tan, UNPAZ sei garante bá merkadu atu bele kontinua mantén sira-nia pozisaun katak UNPAZ mak di’ak liu ona ba sira ho transformasaun estatutu hosi great C ba B no reforma kualidade ne’ebé atu realiza iha tinan oin sei garante duni UNPAZ ninia dignidade iha públiku nia matan.

Jornalista   : Tomé Amado  

Editór        : Francisco Simões

HAKEREK NO HATÁN

Please enter your comment!
Please enter your name here