Lider Karismatiku, Kay Rala Xanana Gusmão, partisipa iha misa agradesimentu ba nia aniversariu ba dala-73 iha Igreja Semináriu Maiór Nossa Señora de Fátima Balide, Dili, Kinta (20/6/2019). Imajen/Eugénio Pereira

DILI, 18 dezembru 2020 (TATOLI)—Prezidente Partidu Congresso Nacional de Reconstrução de Timorensse (CNRT), Kay Rala Xanana Gusmão, hateten selebrasaun festa natal sei lori ambiente respeita malu tanba ema hotu prepara-aan simu kosok-oan.

Notísia Relevante: Xanana: “Mundu akompaña hela situasaun polítika iha Timor-Leste”

“Natál lori ita respeita no hadomi malu. Ho ida-ne’e mak aproveita natal no tinan foun ne’ebé sei mai, karik ita sei hamutuk nafatin, tenke hadomi malu. Presiza fahe esperiénsia no matenek ba malu,” Xanana hato’o mensajen natal bainhira selebra Natal hamutuk ho tema “Hamutuk Hahí no Hanai Jesus Kosok-Oan ne’ebé Mai Atu Lori Libertasaun ba Mundu no Hametin Konfiansa, Hamutuk iha Partidu CNRT, atu Hadomi no Serbí Di’ak Liután”, iha sede partidu CNRT, Bairro dos Grilhos, Dili, sesta ne’e.

Iha selebrasaun natál hamutuk Xanana akresenta, ema hotu nia hanoin ne’e sempre iha sala tanba hanoin mak prodús hahalok la’ós hahalok mak prodús hanoin.

“Ita-nia ta’uk atu ofende-aan rasik. Ha’u labele dehan fali ha’u halo sala, hasai hotu tiha buat sira-ne’e. Ha’u temi hotu buat sira-ne’e tanba ita hotu família boot partidu ninian, hasai tiha ita-nia ta’uk hosi ita-nia fo’er. Labele hanoin ha’u mak halo liu iha partidu, ne’e ita la konsolida-aan,” Eis Prezidente Repúblika ne’e hateten.

Nia husu ba kuadru partidu no militante hotu atu fó liman ba malu hodi serbí rai ne’e di’ak liután.

Iha Natál hamutuk ne’e mós partisipa hosi Eis Prezidente Repúblika, José Manuel Ramos Horta no militante partidu CNRT nian.

Prezidente partidu CNRT fó apelu ba kuadru no militante sira labele ta’uk hasoru situasaun saida de’it, maibé fiar ba Maromak buat hotu sei fásil.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here