Kay Rala Xanana Gusmão. Imajen TATOLI/Dokumentasaun.

DILI, 18 dezembru 2020 (TATOLI)—Prezidente Partidu Congresso Nacional de Reconstrução de Timorensse (CNRT), Kay Rala Xanana Gusmão, hataten nasaun sira iha mundu akompaña hela Timor-Leste nia situasaun polítika.

Notísia Relevante: Xanana husu kuadru sira hametin CNRT defende no valoriza Konstituisaun RDTL

“Nasaun sira iha mundu akompaña hela ita, akompaña no sente katak sira mós triste uitoan tanba ita la’o kapaas tiha ona to’o ikus ita hanesan hakiduk fali,” Xanana ko’alia kestaun ne’e bainhira selebra Natál hamutuk no prepara-an simu tinan foun 2021, iha sede partidu CNRT, iha Bairro dos Grilhos, Dili, sesta ne’e.

Eis Primeiru Ministru ne’e haktuir, ema hotu rona g7+ ne’ebé nia rasik buka hale’u uitoan mundu hodi ba buka rai na’in sira atu rezolve sira-nia problema.

Nia dehan, ho Timor-Leste nia influénsia g7+ bele konvense povu Guineze halo eleisaun demokrátika tanba rai refere ukun-an iha 1974 maibé iha 2013 mak foin halo eleisaun demokrátika.

“Ho ita-nia progresu iha kontrusaun estadu no konstrusaun nasaun, sira haree ita hanesan ezemplu boot ida, g7+ iha rai 20 mak iha laran,” nia dehan.

Xanana hatutan, iha Guiné-Bissau, tinan 40 la halo eleisaun maibé oho-malu de’it no golpe estadu hela de’it.

“Ita ba hanorin sira hala’o eleisaun, ida-ne’e ita la’o kapaas tiha bá-oin, derrepente ita hakiduk fali,” Eis Prezidente Repúblika ne’e hateten.

Jornalista: Evaristo Soares Martins

Editór: Cancio Ximenes

1 KOMENTÁRIU

  1. Timor ne atu lori loss ba nebe, se wanhira ema hanoin diak no tane ass rai ida ne atu halo afansa ba oin maibe ita rasik mak buka kee malu fali ba sala nebe mak ita halo ona ou liu ona.mai ita hamutuk oinsa atu hare futuru timor nia.

HAKEREK NO HATÁN

Please enter your comment!
Please enter your name here