Prezidente Repúblika (PR), Francisco Guterres Lú Olo, kuda ai-kameli iha Triloka. Imajen TATOLI/Osória Marques.

BAUCAU, 18 dezembru 2020 (TATOLI)–Prezidente Repúblika (PR), Francisco Guterres Lú Olo, ho nia espoza hamutuk ho komitiva kuda ai-kameli hamutuk 100 iha Sentru Dezenvolvimentu Komunitária Triloka, iha Munisípiu Baucau, ohin.

PR Lú Olo hateten kuda ai-oan ne’e nu’udar kontribuisaun ida ba dezenvolvimentu hodi proteje ambiente ne’ebé saudável ba jerasaun tuir mai ne’e.

“Ha’u hanoin la’ós de’it kuda ai-oan ka ai-kameli hun 100 maibé ninia mehi ne’e boot tebes para halo dezenvolvimentu ba oin liuhosi agrikultura ne’e. Tanba horisehik ha’u ba vizita agrikultór iha Baucau nian katak timoroan mós halo di’ak ba ita-nia rain. Soké ita-nia kapasidade mak sei kiik atu hakat ba oin. Maibé importante mak ita hahú. Ita halo depois mak ita bele sukat ita-nia forsa ba oin. Se ita la halo buat ida mak ita hanoin ita sei la hatene halo buat ida,” PR Lú Olo hateten  bainhira hala’o vizita iha Sentru Dezenvolvimentu Komunitária hodi kuda ai-kameli iha Suku Triloka, Postu Administrativu Baucau Vila, Munisípiu Baucau, sesta ne’e.

Xefe Estadu ne’e hateten, timoroan labele hanoin rai seluk de’it mak bele halo maibé nia fiar katak timoroan iha kapasidade no prepara hanoin atu dezenvolve rai ida-ne’e ba futuru ne’ebé di’ak no saudável.

“Tanba ne’e mak ha’u hanoin ita presiza tulun malu liuliu ba labarik sira atu oinsá husik hela sinál pozitivu ida katak kuda hela valór hirak ne’e ba sira-nia hanoin no hahalok. Hodi nune’e, sira bele kaer tutan katak buat ne’ebé ita halo ne’e sei di’ak ba sira iha aban bainrua nian,” nia dehan.

Ai-kameli ne’ebé PR ho komitiva no hamutuk ho autoriedade Munisípiu Baucau nian kuda ne’e iha hun 100 maibé antes ne’e Sentru Dezenvolvimentu Komunitária kuda uluk ona ai-hun rihun tolu.

Prezidente Repúblika, Francisco Guterres Lú Olo, ho nia espoza hamutuk ho kometiva no Koordenadór Sentru Dezenvolvimentu Komunitária Triloka, Pe. Martinho G. da Silva Gusmão, kuda ai-kameli hamutuk 100 iha Triloka, Baucau. Imajen TATOLI/Osória Marques.

Entretantu, Koordenadór Sentru Dezenvolvimentu Komunitária, Pe. Martinho G. da Silva Gusmão, hateten sentru ne’e oferese ona formasaun ba ema na’in-27 kona-ba agrikultura nian, ne’ebé ho kór ka relijiaun ne’ebé la hanesan tanba sentru ne’e sai hanesan fatin dame nian ba ema hotu-hotu.

“Ami iha partisipante hamutuk 27 no partisipante ne’e mai hosi relijiaun oioin. Ha’u kontente tanba balun hosi relijiaun protestante, musulmanu, katólika no mós iha arte marsiais oioin. Ami-nia fatin ne’e, fatin dame nian. Tanba ne’e, ami propoin atu oinsá hala’o vida ba ben komun nian,” Padre Martinho hateten.

Padre ne’e haktuir, sentru ne’e harii iha 2004 hodi fó formasaun ba joven sira-ne’ebé hakarak hala’o sira-nia vida iha agrikultura.

“Fatin ne’e ami hakarak sai sentru treinamentu ba área agrikultura nian,” nia dehan.

Nia haktuir, fatin ida-ne’e uluk halo ba sutra maibé animál sira lakohi tolun mak elimina tiha depois fatin ne’e tau sentru agrikultura, atu nune’e sira bele hala’o vida iha agrikultura no agrobisinis. Nia dehan, kontribuisaun kiik-oan ne’e hala’o durante tinan 15 nia-laran, ne’ebé mak suporta hosi komunidade Bucoli ho Aubaca.

“Ami haksolok tebes tanba Prezidente Repúblika ho nia espoza bele vizita diretamente ami-nia sentru agrikultura ne’e. Maibé ami-nia modo seidauk iha. Bainhira iha, ami selu oferese hodi sai sétima bázika nian,” nia hateten.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here