Reprezentante restaurante no kafetaria balun ne’ebé prinxe kritéria ai-han ijiene simu sertifikadu husi MTKI-USAID, iha CCD, sesta (18/12). Imajen TATOLI/António Gonçalves

DILI, 18 dezembru 2020 (TATOLI)--Governu liuhosi Ministériu Turizmu, Komérsiu no Indústria (MTKI) no Ajénsia Nasaun Unida ba Dezenvolvimentu Internasionál (USAID) liuhosi programa ‘Tourism for all Project’, atribui sertifikadu ba restaurante no kafetaria sia ne’ebé prenxe ona padraun seguransa ai-han no ijiene.

Molok serfifika, ekipa MTKI, Ministériu Saúde (MS) no Sekretáriu Estadu Profisionál no Empregu (SEFOPE) ho apoia husi USAID halo inspesaun no avaliasaun hahú fevereiru 2020.

“Parabéns ba restaurante no kafetaria na’in sira-ne’ebé ohin simu sertifikadu hanaran Dili moos no matak. Ita boot sira sai nu’udar ajente ba saúde no seguransa ba ai-han no ijiene,” Vise-Ministru Saúde, Bonifácio Maucoli dos Reis, hateten iha ámbitu seremónia fahe sertifikadu iha Sentru Konvesaun Dili (CCD, sigla portugés), sesta ne’e.

Empreza ne’ebé hetan sertifikasaun hanesan restaurante Agora Food Studio, Burger King Timor Plaza, Black Box, Fátima Coffee, Gloria Jeans Timor Plaza, Restaurante Otél Timor, Restaurante K2C, restaurante no kafetária Moby’s no Rolls & Bowls.

Vise-Ministru Saúde, Bonifácio Maucoli dos Reis, entrega sertifikadu ba reprezentante restorante no kafetaria, iha CCD, sesta (18/12). Imajen TATOLI/António Gonçalves

Biban ne’e, Vise-Ministru Maucoli hato’o agradesementu ba liña ministeriál no sentidu solidariedade ba apoia husi USAID atu hametin no reforsa polítika no programa Governu ho objetivu atu hadi’a komunidade Timor-Leste nia saúde no moris di’ak.

“Ha’u espera programa ne’e la konsentra de’it iha sidade kapitál Timor-Leste, maibé hau sujere nu’udar membru Governu husi área saúde, fazeadamente bele habelar ba munisípiu sira hotu iha Timor-Leste laran tomak inklui Rejiaun Administrativa Espesiál Oé-cusse Ambeno (RAEOA) hodi garantia konsumu ai-han iha restaurante no kafetaria iha Timor-Leste laran tomak,” governante ne’e sujere.

Nune’e mós, bele ajuda emprezáriu, asosiasaun ka organizasaun ne’ebé loke restaurante no kafetaria iha munisípiu hodi bele hetan rendimentu hodi sustenta família atubele seguru ba konsumu ai-han ne’ebé fornese.

Iha biban hanesan, Reprezentante USAID Iha Timor-Leste, Farida A, afirma ajénsia ne’e estabelese programa ‘Dili moos no matak’ atu atinje padraun inspesaun no forma ekipa hodi implementa sistema halo inspesaun ba fatin fa’an ai-han iha munisípiu Dili no fó treinamentu ai-han seguru no ijiene.

USAID fornese ekipamentu ba koziña iha Sentru Treinamentu Vokasionál Juventude tolu no ajuda estabelese ekipa nu’udar sentru ne’ebé di’ak tebes ba ai-han.

“Ha’u orgullu ho susesu programa ne’e no ohin serémonia entrega sertifikadu ne’e hatudu etapa importante ba negósiu na’in sira,” nia akresenta.

Nia nota, setór turizmu hanesan indústria importante ba Timor-Leste ho potensialidade oi-oin ne’ebé mak bele fornese oportunidade serbisu, espesialmente ba juventude no proteje nasaun inklui etapa ida hodi ajua nasaun tuir dalan auto-reziliénsia.

Diretór Nasionál Empreendimentu Atividade no Produtu Turiztíku, Júlio Rebeiro, hateten hahú fevereiru ekipa husi MTKI, SEFOPE no MS inklui USAID halo inspesaun ba restaurante no kafetária ne’ebé prenxe kritéria seguransa ai-han no ijiene hodi bele sertifika.

“Ita fó sertifikasaun ba kolega sira-nia indústria ne’ebé bele prenxe rekezitu ne’ebé iha ona kondisaun balun, maibé projetu pilotu ne’e mak sei foku ba empreza indústria sia de’it,” nia akresenta.

Lansamentu entrega programa ‘Dili moos no matak’ ho objetivu atu hasa’e padraun seguransa ai-han no seguransa ijiene.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here